براہِ راست پی ٹی آئی احتجاج میں اموات: سپریم کورٹ کے آئینی بینچ نے از خود نوٹس کی استدعا مسترد کر دی

وفاقی دارالحکومت اسلام آباد میں احتجاج کے سبب بند راستوں سے رکاوٹیں ہٹانے کا سلسلہ جاری ہے۔ بیشتر داخلی اور خارجی راستوں سے رکاوٹیں ہٹا کر رستے کھولے جا چکے ہیں۔

فیض آباد کے مقام پر لگی تمام بندشیں ختم کر دی گئیں جب کہ فیض آباد میں بند کیے گئے تمام بس ٹرمینل بھی کھل گئے ہیں۔ اسی طرح 26 نمبر چونگی، پشاور روڑ، سنگجانی ٹول پلازہ اور سرینگر ہائی وے پر بھی ٹریفک بحال ہو چکا ہے۔

پرانے مارگلہ روڑ سے بھی کنٹینرز ہٹانے کا عمل مکمل کیا جا چکا ہے۔

اسلام آباد کے ڈپٹی کمشنر عرفان میمن کا کہنا ہے کہ شہر بھر کے مختلف راستوں سے کنٹینرز ہٹانے کا عمل مکمل ہوگیا۔ شہری شاہراہوں پر باآسانی سفر کر سکتے ہیں۔

عرفان میمن نے کہا کہ راستوں کی بندش کی وجہ سے درپیش مشکلات پر ضلعی انتظامیہ معذرت خواہ ہے۔

سپریم کورٹ کے آئینی بینچ نے پاکستان تحریکِ انصاف (پی ٹی آئی) کے احتجاج کے دوران ہلاکتوں پر از خود نوٹس لینے کی استدعا مسترد کر دی ہے۔

سپریم کورٹ میں موسمیاتی تبدیلی اتھارٹی سے متعلق کیس کی سماعت کے دوران خیبر پختونخوا کے ایڈیشنل ایڈووکیٹ جنرل ویڈیو لنک کے ذریعے پیش ہوئے۔

ایڈیشنل ایڈووکیٹ جنرل نے کہا کہ گزشتہ روز دونوں اطراف سے ہلاکتیں ہوئیں۔ آئینی بینچ ازخود نوٹس لے سکتا ہے۔ لہٰذا آئینی بینچ ان واقعات پر ازخود نوٹس لے۔

سپریم کورٹ کے آئینی بینچ کے سربراہ جسٹس امین الدین خان نے اس پر ریمارکس دیے کہ جو معاملہ ہمارے سامنے سرے سے ہے ہی نہیں۔ اسے ہم نہیں دیکھ سکتے۔

بینچ میں شامل جسٹس جمال خان مندوخیل نے کہا کہ یہ معاملہ ہمارے سامنے نہیں ہے۔ اس پر بات نہیں کرنا چاہتے۔

جسٹس مسرت ہلالی نے ایڈیشنل ایڈووکیٹ جنرل کی سرزنش کرتے ہوئے کہ سپریم کورٹ میں پیش ہوکر سیاسی باتیں نہ کریں۔

ہیومن رائٹس کمیشن پاکستان (ایچ آر سی پی) نے پاکستان کے سیاسی حالات کے دوران حکومت اور تحریکِ انصاف کے درمیان مذاکرات شروع کرنے کا مطالبہ کیا ہے۔

ایچ آر سی پی نے ایک بیان میں کہا ہے کہ حکومت اور اپوزیشن خاص طور پر تحریکِ انصاف اسمبلی میں فوری اور بامقصد مذاکرات شروع کریں۔

کمیشن نے کہا ہے کہ ملک کو جامد کرنے کے بجائے آگے بڑھنے کے راستے پر اتفاق کا وقت آ چکا ہے۔ ایچ آر سی پی نے یہ بھی مطالبہ کیا ہے کہ ملک کی دیگر سیاسی جماعتوں کو مذاکرات میں شریک کیا جائے۔

بیان کے مطابق سیاسی کارکنوں کے جذبات کو مجروح کرنے سے بھی گریز کیا جائے۔

اسلام آباد اور پنجاب کا خاص طور پر ذکر کرتے ہوئے کمیشن نے بیان میں کہا ہے کہ اس سارے عمل میں دوسروں کی نقل و حرکت اور روزگار کی آزادی پامال نہ کی جائے۔

پاکستان کے وفاقی دارالحکومت میں منگل اور بدھ کی درمیانی شب سیکیورٹی فورسز کی کارروائی کے بعد تحریکِ انصاف نے احتجاج منسوخ کر دیا ہے۔

احتجاج ختم ہونے کے بعد شاہراہیں خالی ہو گئی ہیں۔ اسلام آباد کی انتظامیہ ایک جانب شاہراہوں سے رکاوٹیں ہٹا رہی ہے جب کہ ساتھ ہی سڑکوں کی صفائی کا عمل بھی جاری ہے۔ کئی مقامات پر تباہ حال گاڑیاں اب بھی موجود ہیں جن کو مشینری سے ہٹایا جا رہا ہے۔

امن و امان کو برقرار رکھنے کے لیے کئی جگہ اب بھی پنجاب رینجرز کے اہلکار نظر آ رہے ہیں۔