شیخ حسینہ کی کابینہ کے وزرا کی گرفتاریوں اور بیرونِ ملک جانے کی اطلاعات

بنگلہ دیش میں طلبہ کی احتجاجی تحریک کی مرکزی قیادت نے نوبیل انعام یافتہ ماہرِ معیشت اور شیخ حسینہ کے سیاسی حریف محمد یونس کی سربراہی میں حکومت بنانے کا مطالبہ کیا ہے۔

شیخ حسینہ کے وزارتِ عظمیٰ سے استعفے اور بھارت روانگی کے اگلے دن بنگلہ دیش کے صدر شہاب الدین نے اسمبلی تحلیل کر دی ہے اور نئے انتخابات کے لیے عبوری حکومت کی تشکیل کا عندیہ دیا ہے۔

طلبہ نے عبوری حکومت کی سربراہی کے لیے بینکر محمد یونس کا نام تجویز کیا ہے۔ محمد یونس نے قرضے دینے والا 'گرامین بینک' قائم کیا تھا۔ اس بینک کے ذریعے بنگلہ دیش میں غربت کے خاتمے کے لیے محمد یونس کی خدمات کے اعتراف میں انہیں 2006 میں نوبیل امن انعام دیا گیا تھا۔

مزید پڑھیے

بنگلہ دیش کی سپریم کورٹ بار ایسوسی ایشن کے صدر اے ایم محبوب الدین خاکان نے بھارت سے مطالبہ کیا ہے کہ وہ سابق وزیرِ اعظم شیخ حسینہ اور ان کی بہن کو گرفتار کرکے بنگلہ دیش کے حوالے کرے۔

محبوب الدین کا کہنا ہے کہ ہم بھارت کے عوام کے ساتھ اچھے تعلقات کے خواہاں ہیں۔ شیخ حسینہ اور ان کی بہن شیخ ریحانہ فرار ہو کر بھارت گئی ہیں۔ شیخ حسینہ بنگلہ دیش میں کئی لوگوں کی موت کی ذمے دار ہیں اس لیے بھارت انہیں گرفتار کرکے وطن واپس بھیجے۔

انہوں نے مطالبہ کیا کہ شیخ حسینہ کی حکومت کے مقرر کردہ اٹارنی جنرل، اینٹی کرپشن کمیشن کے حکام اور نیشنل ہیومن رائٹس کمیشن ارکان ایک ہفتے کے اندر مستعفی ہوجائیں۔