آئینی ترامیم: قومی اسمبلی کا سات گھنٹے تاخیر سے شروع ہونے والا اجلاس چند منٹ میں ملتوی

وفاقی وزرا پر مشتمل وفد ایک بار پھر جمعیت علماء اسلام (ف) کے سربراہ مولانا فضل الرحمٰن کی رہائش گاہ آمد ہوئی ہے۔

حکومتی وفد کے سربراہ نائب وزیرِ اعظم اسحٰق ڈار ہیں جب کہ اس میں وزیرِ قانون اعظم نذیر تارڑ اور وزیرِ داخلہ محسن نقوی سمیت دیگر ارکان شامل ہیں۔

مقامی میڈیا کے مطابق حکومتی وفد مولانا فضل الرحمٰن کو آئینی عدالتوں کے قیام کے حوالے سے آگاہ کرے گا۔

بلوچستان نیشنل پارٹی (بی این پی مینگل) کے سربراہ اختر مینگل نے مطالبہ کیا ہے کہ بلوچستان کے دو ہزار لاپتا افراد کو رہا کیا جائے جس کے بعد وہ آئینی ترمیم کے لیے حکومت کو ووٹ دیں گے۔

سوشل میڈیا پر انہوں نے یہ بیان اتوار کو اس وقت جاری کیا جب حکومت کو آئینی ترمیم کے لیے اپنے نمبر پورے کرنے میں دشواری کا سامنا ہے۔

بی این پی مینگل کے سینیٹ میں دو ارکان ہے حکومت کو آئینی ترمیم کے لیے ان کی حمایت درکار ہے۔

پاکستان تحریکِ انصاف کا وفد مولانا فضل الرحمان سے ملاقات کے لیے ان کی رہائش گاہ پہنچ گیا ہے۔

پی ٹی آئی کے وفت میں اسد قیصر اور شبلی فراز بھی شامل ہیں۔

اس سے قبل نائب وزیرِ اعظم اسحاق ڈار کی سربراہی میں حکومتی وفد جے یو آئی کے سربراہ سے ملاقات کرکے روانہ ہوا تھا۔

حکومت کے مجوزہ آئینی پیکج سے متعلق حکومت اور پی ٹی آئی کے سربراہ جے یو آئی سے رابطوں اور ملاقاتوں کا سلسلہ ہفتے اور اتوار کی درمیان شب سے جاری ہے۔

اس سے قبل بھی جے یو آئی کے سربراہ اور پی ٹی آئی کے رہنماؤں کے درمیان دو ملاقاتیں ہوچکی ہیں۔

پاکستان کے ایوانِ بالا (سینیٹ) کا اجلاس ایک بار پھر مؤخر کر دیا گیا ہے۔

سینیٹ کا اجلاس اتوار کی شام سات بجے طلب کیا گیا تھا۔ لیکن سینیٹ سیکریٹریٹ سے جاری ہونے والے اعلامیے کے مطابق اجلاس سات بجے کے بجائے اب اتوار کی رات 10 بجے ہوگا۔

اعلامیے کے مطابق سینیٹ کے دفاتر اجلاس ختم ہونے تک کھلے رہیں گے۔

مقامی میڈیا کے مطابق اب بھی یہ واضح نہیں ہے کہ سینیٹ کا اجلاس رات کو دس بجے ہو سکے گا یا نہیں۔