سپريم ڪورٽ پنجاب ۽ خيبرپختونخوا ۾ 90 ڏينهن اندر چونڊون ڪرائڻ جو فيصلو اچڻ کان پوءِ پاڪستان تحريڪ انصاف (پي ٽي آئي) پنهنجي ’جيل ڀريو تحريڪ’ معطل ڪرڻ جو اعلان ڪيو آهي.
تحريڪ انصاف جي چيئرمين ۽ اڳوڻي وزير اعظم عمران خان عدالت جي فيصلي جو خير مقدم ڪندي چيو آهي ته آئين جو تحفظ سپريم ڪورٽ جو فرض هيو ۽ ججن پنهنجي فيصلي سان اهو فرض بهادريءَ سان نڀايو.
سوشل ميڊيا تي هڪ بيان ۾ عمران خان وڌيڪ چيو ته تحريڪ انصاف پنهنجي جيل ڀريو تحريڪ معطل ڪئي آهي.
هن چيو ته خيبرپختونخوا ۽ پنجاب ۾ چونڊن جي مهم اڳتي وڌي رهي آهي.
اربع ڏينهن سپريم ڪورٽ پنجاب ۽ خيبرپخونخوا ۾ 90 ڏينهن جي اندر چونڊن ڪرائڻ جو حڪم ڏنو آهي. چيف جسٽس عمر عطا بنديال اڱاري تي پاڻ مرادو نوٽيس ڪيس ۾ محفوظ ڪيل فيصلو اربع جي صبح جو ٻڌايو. فيصلي ۾ چيو ويو آهي ته اليڪشن ڪميشن چونڊن جي تاريخ تجويز ڪري جڏهن ته وفاق ان حوالي سان اليڪشن ڪميشن کي وسيلا فراهم ڪري.
خيال رهي ته عمران خان 17 فيبروريءَ تي ’جيل ڀريو تحريڪ’ شروع ڪرڻ جو اعلان ڪيو هو.
ان تحريڪ ۾ جيڪو شيڊول جاري ڪيو ويو هو، ان جي مطابق ان جو آغاز 22 فيبروريءَ تي ٿيو هو جڏهن ته پهرئين مارچ تائين گرفتارين ڏيڻ جو شيڊول موجود هيو.
هن تحريڪ جي پهرئين ڏينهن تحريڪ انصاف جي وائس چيئرمين شاه محمود قريشيءَ سميت 70 ڪارڪنن لاهور ۾ گرفتاري پيش ڪئي هئي.
ان کان پوءِ پي ٽي آئي جي ڪيترا ئي رهنما ۽ ڪارڪنن گرفتاريون پيش ڪري چڪا آهن.
ٻئي پاسي، حڪومتي جماعتون دعويٰ ڪري رهيون هيون ته پي ٽي آئي جي ’جيل ڀريو تحريڪ’ ناڪام رهي آهي.
اليڪشن ڪميشن جو اجلاس سڏايو ويو
سپريم ڪورٽ جي فيصلي کان پوءِ اليڪشن ڪميشن هنگامي اجلاس سڏايو آهي.
مڪاني ميڊيا مطابق چيف اليڪشن ڪمشنر جي صدارت هيٺ ٿيڻ واري اجلاس ۾ سپريم ڪورٽ جي فيصلي تي غور ڪيو ويو.
حڪومت پاران فيصلو چيلينج نه ڪرڻ جو اعلان
قانون واري وفاقي وزير اعظم تارڙ چيو آهي ته وفاقي حڪومت جو پنجاب ۽ خيبرپختونخوا جي صوبائي اسيمبلين جي چونڊن متعلق سپريم ڪورٽ جي فيصلي تي نظرثانيءَ جي اپيل دائر ڪرڻ جو ڪو ارادو ڪونهي.
سندس خيال ۾ هي درخواست چار ,ٽن سان مسترد ڪئي وئي آهي.
