|
تائیوان کی سیمی کنڈکٹر مینیوفیکچرنگ کمپنی ٹی ایس ایم سی کے سی ای او ، سی سی وئے نے پیر کو اعلان کیا کہ ان کی کمپنی آنے والے برسوں میں امریکہ میں 100 ارب ڈالر کی اضافی سرمایہ کاری اور پانچ اضافی چپ فیکٹریاں بنانے کا ارادہ رکھتی ہے ۔
کمپنی کے سی ای او نے یہ اعلان وائٹ ہاؤس میں صدر ڈونلڈ ٹرمپ کے ساتھ ایک میٹنگ کے دوران کیا ۔
ٹرمپ نے اس موقع پر کہا، ،’’ ہمیں چپس اور سیمی کنڈکٹر بنانے کے قابل ہونا چاہیے جس کی ہمیں یہاں ضرورت ہے ۔ ‘‘ انہوں نے مزید کہا،’’ یہ ہماری قومی سلامتی کا معاملہ ہے ۔‘‘
ٹی ایس ایم سی ، جو دنیا میں چپ بنانے والی سب سے بڑی کمپنی ہے ، امریکہ کی ہارڈ وئیر بنانے والی کمپنیوں کو سب سے زیادہ چپ فراہم کرتی ہے ۔
تائیوانی صدر لائی چھنگ ۔ٹو نے تائیوانی سیمی کنڈکٹر مینیو فیکچرنگ کارپوریشن، ٹی ایس ایم سی ، کی جانب سے امریکہ میں مجوزہ 100 ارب ڈالر کی سرمایہ کاری کا خیر مقدم کرتے ہوئے اسے امریکہ اور تائیوان کے تعلقات کے لیے ایک تاریخی لمحہ قرار دیا ہے ۔
پانچ نومبر کے انتخابات میں اپنی کامیابی کے بعد سے ٹرمپ نے روزگار پیدا کرنے کے لیے ملکی صنعتوں میں سرمایہ کاری کو بڑھانے کی کوششوں میں اضافہ کر دیا ہے ۔
ٹی ایس ایم سی کی جانب سے ایسی سرمایہ کاری کے اعلان سے قبل فروری میں ایپل کمپنی نے کہا تھا کہ وہ اگلے چار برسوں میں 500 ارب ڈالر کی سرمایہ کاری کرے گی۔ امارات کے ارب پتی حسین سجوانی اور سوفٹ بنک نے بھی امریکہ میں کئی ارب ڈالر کی سرمایہ کاری کا وعدہ کیا ہے ۔
فورم