طالبان اختياريءَ وارن افغانستان جي گاديءَ واري هنڌ ڪابل ۽ ڪيترن ٻين شهرن ۾ سرڪاري يونيورسٽيون ٻيهر کولهڻ جو اعلان ڪيو آهي، پر سندن چون آهي ته اتي رڳو مرد شاگردن کي وڃڻ جي اجازت هوندي.
طالبان جي اعليٰ تعليم واري وزارت هڪ مختصر بيان ۾ چيو آهي ته ’’اعليٰ تعليم جي سپريم ڪائونسل جي فيصلي مطابق، سرد علائقن وارن صوبن ۾ سرڪاري اعليٰ تعليمي ادارن ۾ مرد شاگردن جي تعليم جو باقاعدي آغاز هن سال ڇهين مارچ کان ٿيندو.
افغانستان جي 34 منجهان لڳ ڀڳ 24 صوبن ۾ سيءَ جي مند ۾ اسڪولن ۽ يونيورسٽن ۾ ساليانو موڪلون هونديون آهن.
گزريل سال طالبان عورتن جي لاءِ اعليٰ تعليم تي اهو چوندي پابندي لڳائي هئي ته اڳوڻي حڪومت جي وقت ۾ عورتون صنفي بنياد تي لڳل پابندين جو مناسب خيال نه رکيو هو.
آگسٽ 2021 ۾ اقتدار تي قبضو ڪرڻ کان پوءِ طالبان عورتن جي تعليم تي پابنديءَ جي باري ۾ اهو چوندا رهيا آهن ته اها عارضي آهي ۽ ان متعلق جلد فيصلو ڪيو ويندو.
انساني حقن جي گروهن جي مطابق، افغانستان دنيا جو واحد ملڪ آهي جتي عورتن ۽ نينگرين کي سرڪاري طور تي تعليم ۽ ڪم کان روڪيو ويو آهي.
ڇوڪرين ۽ عورتن جي حمايت ڪرڻ واري هڪ غير سرڪاري تنظيم، ’لرن افغانستان’ جي ڊائريڪٽر، پشتانه درانيءَ چيو آهي ته ’’طالبان جي حلقي اندر اقتدار جي اندروني ڪشمڪش هلي رهي آهي’’.
سندس چواڻي، هن وقت طالبان ان مشڪل ۾ ڦاٿل آهن ته اهي پنهنجي امير کي نه ٿا هٽائي سگهن ۽ نه ئي احتساب ڪري سگهن ٿا، جيڪو اهڙو شخص آهي جيڪو اسڪولن ۽ يونيورسٽين ۾ عورتن جي داخلا وٺڻ جو مخالف آهي.
هڪ نامور خاتون صحافي، فرح ناز فروتن، جيڪا طالبان جي ڪابل تي قبضي کان پوءِ افغانستا ڇڏي ٻاهر هلي وئي هئي، چيو آهي ته نينگرين ۽ عورتن جي لاءِ تعليم کان انڪار طالبان اڳواڻ جو افسوس ناڪ عمل آهي جنهن جا لکين افغانن جي لاءِ هاڃيڪار نتيجا نڪرندا.
(اڪمل دعوي، وي او اي نيوز)
