آمريڪا افغانستان جي لاءِ اڳوڻي خصوصي نمائندي ۽ سفير زلمي خليل زاد جي پاڪستاني سياست بابت بيانن کان لاتعلقي ءَجو اظهار ڪيو آهي.
آمريڪي پرڏيهي کاتي جي نائب ترجمان ويدانت پٽيل سومر تي معمول جي بريفنگ دوران واضح ڪيو ته زلمي خليل زاد جي بيانن جو آمريڪي حڪومت سان ڪو به تعلق ناهي. پاڪستاني عوام کي آئين ۽ قانون موجب جمهوري طريقي سان پنهنجا اڳواڻ چونڊڻ جو حق حاصل آهي.
هڪ سوال جي جواب ۾ ويدانت پٽيل چيو ته زلمي خليل زاد ھڪ خانگي شهري آهي ۽ ھُن سوشل ميڊيا تي تبصرا ۽ ٽوئيٽس سندس ذاتي حيثيت ۾ ڪيا آهن. سندس چوڻ هو ته زلمي خليل زاد جا خيال نه آمريڪا جي پرڏيهي پاليسي ۽ نه وري هاڻوڪي آمريڪي انتظاميه جي نمائندگي ڪن ٿا.
پاڪستان ۾ جاري سياسي بحران بابت هڪ سوال جي جواب ۾ ويدانت پٽيل چيو ته تشدد، ھيسائڻ ۽ ڌمڪائڻ جو سياست سان ڪو به تعلق ناهي. آمريڪا سڄي دنيا ۾ پنهنجن اتحادين جيان پاڪستان ۾ به مڙني واڳ ڌڻين کان اميد ٿو رکي ته ھو قانون جي حڪمراني جو احترام ڪندا.
گذريل هفتي خليل زاد پاران اڳوڻي وزيراعظم عمران خان جي حمايت ۾ بيان پاڪستان ۾ بحث جو موضوع بڻيل رهيا، جڏھن ته پاڪستاني حڪمران اتحاد ۽ پرڏيهي آفيس انھن بيانن کي پاڪستان جي اندروني معاملن ۾ مداخلت قرار ڏنو هو.
اڳوڻي آمريڪي سفارتڪار خليل زاد گذريل هفتي هڪ ٽوئيٽ ۾ چيو هو ته "پاڪستان ۾ سول ۽ فوجي اڳواڻ پنهنجي ملڪ جي حالت ۽ ان جي تباهي ءَواري رستي تي (ھلڻ بابت) غور ڪري سگهن ٿا".
خليل زاد پاڪستان جي سياسي ۽ فوجي قيادت کي مشورو ڏنو ته هو پنهنجي ذميوارين ۽ عوام جي مفاد کي آڏو رکندي پنهنجو رخ ۽ رستو تبديل ڪن.
پاڪستان جي پرڏيهي آفيس جي ترجمان گذريل هفتي معمول جي بريفنگ دوران خليل زاد جو نالو وٺڻ کانسواءِ چيو ھو ته پاڪستان جي ٻاهران ايندڙ ڪو به آواز يا بيان پاڪستان جي جمهوري سياست ۽ عوام تي اثر انداز نٿو ٿي سگهي.
هن چيو ته پاڪستان جا عوام ايترا باشعور آهن جو هو پنهنجا فيصلا پاڻ ڪري سگهن ٿا ۽ کين ٻاهران کان ڪنهن جي به مشوري جي ضرورت ناهي.
پاڪستان جي پرڏيهي وزارت جي ترجمان ممتاز زهرا بلوچ جو چوڻ هو ته پاڪستان اهڙي بيان جي ڪري ٿيندڙ ڪنھن به قسم جي تنقيد يا مداخلت کي منھن ڏئي سگهي ٿو.
خليل زاد گذريل ڪجهه ڏينهن ۾ ڪيترائي ڀيرا ٽوئيٽس ذريعي پاڪستان جي صورتحال تي تبصرو ڪيو آهي.
هن 14 مارچ تي چيو ته جيڪڏهن عمران خان کي گرفتار ڪيو ويو ته پاڪستان ۾ سياسي بحران وڌي ويندو. ان سان گڏ هن حڪومت کي جون جي مھيني ۾ سڄي ملڪ اندر چونڊون ڪرائڻ جي پڻ تجويز ڏني ھئي.
