صدر ٹرمپ کی اسپتال سے وائٹ ہاؤس واپسی

صدر ٹرمپ میں جمعرات کی شب وائرس کی تصدیق ہوئی تھی جس کے بعد اُنہیں جمعے کو اسپتال میں داخل کر لیا گیا تھا۔

صدر ٹرمپ بذریعہ ہیلی کاپٹر اسپتال سے وائٹ ہاؤس کے لیے روانہ ہوئے۔

صدر ٹرمپ کے معالج ڈاکٹر شان کونلی نے پیر کی شام میڈیا کو بریفنگ دیتے ہوئے بتایا کہ ڈاکٹروں نے مشاورت کے بعد فیصلہ کیا ہے کہ صدر ٹرمپ کی حالت بہتر ہے اور وہ گھر واپس جا سکتے ہیں۔
 

صدر ٹرمپ نے جمعے کو اپنے ایک ٹوئٹ کے ذریعے بتایا تھا کہ وہ اور خاتونِ اول میلانیا ٹرمپ کرونا وائرس کا شکار ہو گئے ہیں۔ اسی روز صدر ٹرمپ کو بخار کی شدت میں اضافے کے بعد اسپتال منتقل کر دیا گیا تھا۔

صدر ٹرمپ نے اپنی نئی ٹوئٹ میں بھی کہا کہ کرونا وائرس سے خوف زدہ ہونے کی ضرورت نہیں اور نہ ہی اسے اپنے اوپر حاوی ہونے دیں۔ اُن کے بقول وہ اس وقت خود کو 20 برس کم عمر محسوس کر رہے ہیں۔

وائٹ ہاؤس پہنچنے پر صدر ٹرمپ نے میڈیا کے کیمروں کو دیکھ کر اپنے دونوں انگوٹھے فضا میں بلند کیے اور چہرے سے ماسک اُتار دیا۔

صدر ٹرمپ نے دعویٰ کیا کہ حکومت نے کرونا کے علاج کے لیے زبردست ادویات تیار کرلی ہیں اور ویکسین بھی جلد آنے والی ہے۔