کشمیر پریمیئر لیگ (کے پی ایل) کے صدر نے بھارتی کرکٹ ٹیم کے مایہ ناز بلے باز وراٹ کوہلی کو ٹورنامنٹ کھیلنے کے لیے پاکستان کے زیرِ انتظام کشمیر آنے کی دعوت دی ہے۔
ٹوئٹر پر جاری کی گئی ویڈیو میں کے پی ایل کے صدر عارف ملک نے کہا کہ وہ وراٹ کوہلی کو کے پی ایل کا حصہ بننے کے لیے باضابطہ دعوت نامہ بھجوا رہے ہیں۔
اُن کے بقول یہ کوہلی پر منحصر ہے کہ وہ بطور کھلاڑی کے پی ایل کا حصہ بنتے ہیں یا بطور خصوصی مہمان کے طور پر ٹورنامنٹ میں شرکت کرتے ہیں۔
عارف ملک کا مزید کہنا تھا کہ کے پی ایل کے ذریعے وہ بھارت کو امن کا پیغام دینا چاہتے ہیں اور چاہتے ہیں کہ بھارتی کھلاڑی بھی کے پی ایل کا حصہ بنیں۔
We are sending a formal invitation to Virat Kohli.It%27s up to Virat Kohli whether to become part of the league as a player or as a special guest. We are sending a message of peace through KPL and want Indian cricketers to be part of the league." Arif Malik President of KPL" pic.twitter.com/OopBpeZ6oj
— Kashmir Premier League (@kpl_20) May 17, 2022
خیال رہے کہ کشمیر پریمیئر لیگ کا پہلا ایڈیشن گزشتہ برس پاکستان کے زیرِ انتظام کشمیر کے دارالحکومت مظفر آباد میں ہوا تھا جس میں جنوبی افریقہ اور سری لنکا کے سابق کھلاڑیوں نے بھی حصہ لیا تھا۔
البتہ کے پی ایل کی وجہ سے پاکستان اور بھارت کے درمیان تنازع نے بھی جنم لیا تھا۔ گزشتہ برس پاکستان کے دفترِ خارجہ اور پاکستان کرکٹ بورڈ (پی سی بی) نے الزام عائد کیا تھا کہ بھارتی کرکٹ بورڈ (بی سی سی آئی) نے دنیا کے مختلف ملکوں کے کرکٹ بورڈز سے کہا ہے کہ وہ اپنے کھلاڑیوں کو کے پی ایل میں نہ بھیجیں۔
اس دعوے کو اس وقت تقویت ملی تھی جب جنوبی افریقہ کے سابق کرکٹر ہرشل گبز نے ایک ٹوئٹ میں دعویٰ کیا کہ اُنہیں دھمکیاں دی گئی ہیں کہ اگر وہ کے پی ایل میں گئے تو اُنہیں بھارت میں کرکٹ کے حوالے سے کسی بھی سرگرمی میں شامل نہیں کیا جائے گا۔
Completely unnecessary of the @BCCI to bring their political agenda with Pakistan into the equation and trying to prevent me playing in the @kpl_20 . Also threatening me saying they won’t allow me entry into India for any cricket related work. Ludicrous 🙄
— Herschelle Gibbs (@hershybru) July 31, 2021
بھارتی کرکٹ بورڈ کے ایک اہل کار نے بھارتی میڈیا کو بتایا تھا کہ بی سی سی آئی نے غیر ملکی کھلاڑیوں کو وارننگ ملک کے وسیع تر مفاد میں دی تھی۔ خیال رہے کہ بھارت پاکستان کے زیرِ انتظام کشمیر کو بھی اپنا حصہ سمجھتا ہے۔ اسی طرح پاکستان بھارت کے زیرِ انتظام کشمیر پر اپنا دعویٰ رکھتا ہے۔
کشمیر پریمیئر لیگ چھ فرنچائز ٹیموں پر مشتمل کرکٹ لیگ ہے جن کے مالکان کاروباری شخصیات ہیں، تاہم پاکستان کرکٹ بورڈ (پی سی بی) نے اس کی باضابطہ منظوری دے رکھی ہے۔
اس ایونٹ میں میرپور، باغ، کوٹلی، راولا کوٹ، مظفر آباد اور اوورسیز کے نام سے بھی ٹیمیں شامل ہیں۔
گزشتہ برس کے ایڈیشن میں راولا کوٹ ہاکس نے کامیابی حاصل کی تھی۔