امریکی صدر ڈونلڈ ٹرمپ نے آج منگل کے روز ایک تازہ ٹویٹ میں کہا ہے کہ بالآخر ایران کے عوام اپنی ظالم اور بدعنوان حکومت کے خلاف اُٹھ کھڑے ہوئے ہیں۔ اُنہوں نے کہا کہ سابق صدر اوباما نے ایران کو بھاری رقوم دے کر غلطی کی تھی اور یہ رقوم ایران میں دہشت گردی پھیلانے کیلئے استعمال ہو ئیں یا پھر حکمرانوں کی جیبوں میں چلی گئیں۔
The people of Iran are finally acting against the brutal and corrupt Iranian regime. All of the money that President Obama so foolishly gave them went into terrorism and into their “pockets.” The people have little food, big inflation and no human rights. The U.S. is watching!
— Donald J. Trump (@realDonaldTrump) January 2, 2018
اُنہوں نے کہا کہ ایرانی عوام کو ناکافی خوراک اور افراط زر کا سامان ہے اور ایران کے لوگوں کو حقوق سے محروم کر دیا گیا ہے۔اُنہوں نے خبردار کیا کہ امریکہ ایران پر کڑی نظر رکھے ہوئے ہے۔
Iran is failing at every level despite the terrible deal made with them by the Obama Administration. The great Iranian people have been repressed for many years. They are hungry for food & for freedom. Along with human rights, the wealth of Iran is being looted. TIME FOR CHANGE!
— Donald J. Trump (@realDonaldTrump) January 1, 2018
اس سے قبل پیر کے روز ایک اور ٹویٹ میں صدر ٹرمپ نے کہا تھا کہ سابق صدر اوباما کی طرف سے ایران کے ساتھ جوہری سمجھوتے کے باوجود ایران کی ریاست ناکام ہو رہی ہے۔ ایران کے عظیم عوام برسوں سے حکمرانوں کے ظلم و ستم کا شکار ہیں اور وہ خوراک اور جائز حقوق سے محروم ہیں۔ اُنہوں نے کہا کہ ایران کی دولت لوٹی جا رہی ہے۔
صدر ٹرمپ کی ٹویٹس کے جواب میں رد عمل کا مظاہرہ کرتے ہوئے ایران کی وزارت خارجہ نے کہا ہے کہ دیگر ممالک کے بارے میں بے کار اور تضحیک آمیز ٹویٹس پر وقت ضائع کرنے کے بجائے صدر ٹرمپ کیلئے یہ بہتر ہو گا کہ وہ اپنے ملک کے اندر نظر ڈالیں جہاں بقول اُس کے ہر روز درجنوں لوگ قتل کر دئے جاتے ہیں اور لاکھوں بے گھر افراد خوراک سے محروم سڑکوں پر گزارا کر رہے ہیں۔ ایرانی وزارت خارجہ کے ترجمان بہرام گھاسیمی نے ایر ان کے عوام سے کہا ہے کہ وہ صدر ٹرمپ یا امریکی اہلکاروں کے ایران مخالف بیانات پر کان نہ دھریں۔
ایران کے متعدد بڑے شہروں میں ملک میں خوراک کی قیمتوں میں اضافے پر صدر حسن روحانی اور مجموعی طور پر ایرانی حکومت کے خلاف شدید مظاہرے جاری ہیں اور اطلاعات کے مطابق ان مظاہروں میں اب تک 21 افراد ہلاک ہو چکے ہیں۔