معروف گلوکار عدنان سمیع نے حال ہی میں وہ تمام تر وجوہات سامنے لانے کا اعلان کیا ہے جس کی وجہ سے انہوں نے پاکستان کی شہریت چھوڑ کر بھارت میں رہنے کو ترجیح دی ہے۔
عدنان سمیع نے 2016 میں پاکستان کی شہریت ترک کی اور اسی سال ان کو بھارت کی شہریت مل گئی تھی۔
گلوکار عدنان سمیع نے پیر کو سوشل میڈیا اکاؤنٹس پر ایک پوسٹ شیئر کی جس میں انہوں نے کہا کہ "مجھ سے بہت سے لوگ یہ سوال کرتے ہیں کہ آپ پاکستان سے متعلق اتنی سخت رائے کیوں رکھتے ہیں؟"
1/3Many people ask me why I have such contempt towards Pakistan. The hard truth is that I have absolutely no contempt towards the people of Pakistan who have been good to me. I love everyone who loves me- period.
— Adnan Sami (@AdnanSamiLive) November 14, 2022
انہوں نے کہا کہ "سچ یہ ہے کہ میں پاکستان کی عوام کے لیے کسی قسم کی حقارت محسوس نہیں کرتا، جنہوں نے مجھ سے بہت اچھا سلوک کیا، میں ہر اس شخص سے محبت کرتا ہوں جو مجھے چاہتا ہے۔"
عدنان سمیع نے الزام عائد کیا کہ ان کے پاکستان کی اسٹیبلشمنٹ کے ساتھ بڑے مسائل تھے۔
خیال رہے کہ پاکستان میں اعلیٰ سیکیورٹی اداروں کو اسٹیبلشمنٹ کا نام دیا جاتا ہے۔
2/3However, I have major issues with the establishment. Those who truly know me will also know what that establishment did to me for many years which ultimately became one of the big reasons for me to leave Pak.
— Adnan Sami (@AdnanSamiLive) November 14, 2022
گلوکار کے بقول "جو لوگ مجھے صحیح معنوں میں جانتے ہیں، وہ یہ بھی جانتے ہوں گے کہ اسٹیبلشمنٹ نے کئی برس تک میرے ساتھ کیا کیا، جو بالآخر میرے پاکستان چھوڑنے کی ایک بڑی وجہ بنی۔"
ان کا مزید کہنا تھا ایک دن، جلد ہی وہ اس حقیقت کو بے نقاب کریں گے کہ ان کے ساتھ کیسا سلوک کیا گیا، جس سے بہت لوگ لاعلم ہیں۔
عدنان سمیع کا یہ بھی کہنا تھا کہ "میں کئی برس سے خاموش تھا البتہ میں سب کچھ بتانے کے لیے صحیح وقت کا انتخاب کروں گا۔‘‘
3/3One day, soon, I will expose the reality of how they treated me which no many know, least of all the general public which will shock many! I have remained silent about all this for many years, but will choose the right moment to tell all to the world…
— Adnan Sami (@AdnanSamiLive) November 14, 2022
خیال رہے کہ عدنان سمیع لندن میں پیدا ہوئے تھے جب کہ ان کے والد پاکستانی تھے۔
عدنان سمیع نے 1993 میں پاکستانی اداکارہ زیبا بختیار سے شادی کی تھی جن سے ان کا ایک بیٹا آذان سمیع خان ہے۔ دونوں میں شادی کے تین برس بعد ہی علیحدگی ہو گئی تھی۔
انہوں نے 2015 میں بھارتی شہریت کے لیے درخواست دی تھی جب کہ 2016 میں انہیں شہریت دی گئی۔
گلوکار عدنان سمیع کے مشہور البمز میں ’کبھی تو نظر ملاؤ‘ اور’ تیرا چہرہ‘ شامل ہے جب کہ انہوں نے ’بھر دو جھولی‘، ’لفٹ کرا دے‘، ’بھیگی بھیگی راتوں میں‘ سمیت بے شمار مشہور گانے گائے ہیں۔
عدنان سمیع کو 26 جنوری 2020 کو بھارت کے یومِ جمہوریہ کے موقع پر بھارت کا اعلیٰ ترین سول اعزاز 'پدما شری ایوارڈ' دیا گیا تھا۔