اسمبلی اجلاس میں تاخیر، تحریکِ انصاف کا توہینِ عدالت کی درخواست دائر کرنے کا اعلان
پنجاب اسمبلی میں وزارتِ اعلٰی کے انتخاب میں تاخیر کے باعث تحریکِ انصاف نے سپریم کورٹ میں توہینِ عدالت کی درخواست دائر کرنے کا اعلان کر دیا ہے۔
رہنما تحریکِ انصاف فواد چوہدری نے ایک ٹویٹ میں بتایا کہ صوبائی اسمبلی کے اجلاس میں تاخیر سپریم کورٹ کے احکامات کی خلاف ورزی ہے۔
اُن کا کہنا تھا ک وکلا کو توہینِ عدالت کی درخواست دائر کرنے کا کہہ دیا گیا ہے۔
چوہدری شجاعت حسین نے عمران خان کے اُمیدوار کی حمایت سے انکار کر دیا ہے:صحافی حامد میر کا دعویٰ
وزیرِ اعلٰی پنجاب کے انتخاب سے قبل ہی ایک اور نیا موڑ آگیا ہے۔ سینئر صحافی اور اینکر پرسن حامد میر نے مونس الہٰی سے گفتگو کا حوالہ دیتے ہوئے دعویٰ کیا ہے کہ مسلم لیگ (ق) کے صدر چوہدری شجاعت حسین نے پرویز الہٰی کی حمایت سے انکار کر دیا ہے۔
مونس الہٰی نے حامد میر کو بتایا کہ وہ ماموں (چوہدری شجاعت) سے یہ دریافت کرنے گئے تھے کہ کیا آپ نے پنجاب اسمبلی کے ڈپٹی اسپیکر کو اراکین اسمبلی سے متعلق کوئی خط لکھا ہے جس پر چوہدری شجاعت حسین نے کہا جی بالکل میں نے خط لکھا ہے۔
حامد میر کے بقول مونس الہٰی نے اُنہیں بتایا کہ میں بھی ہار گیا اور عمران خان بھی ہار گئے اور آصف زرداری جیت گئے۔
ڈپٹی اسپیکر دوست محمد مزاری کی زیرِ صدارت پنجاب اسمبلی کا اجلاس شروع
پنجاب کے وزیرِ اعلٰی کے انتخاب کے لیے پنجاب اسمبلی کا اجلاس شروع ہو گیا ہے۔
اجلاس کی صدارت ڈپٹی اسپیکر دوست محمد مزاری کر رہے ہیں۔پنجاب کی وزارتِ اعلٰی کے لیے حمزہ شہباز اور چوہدری پرویز الہٰی مدِمقابل ہیں۔
وزارتِ اعلٰی کے اُمیدوار حمزہ شہباز شریف ایوان میں موجود ہیں۔
مسلم لیگ (ن) اپنے ساتھ ہونے والا سلوک نہیں بھولی: مریم نواز
مسلم لیگ (ن) کی نائب صدر مریم نواز نے کہا ہے کہ مسلم لیگ (ن) اپنے ساتھ ہونے والے سلوک کو نہیں بھولے گی۔
ایک ٹویٹ میں اُن کا کہنا تھا کہ اب کھیل کے ضوابط ہر کسی کے لیے ایک جیسے ہوں گے، اور مسلم لیگ (ن) زیادہ بہتر کھیلنا جانتی ہے۔