تحریکِ انصاف کا احتجاج، اسلام آباد میں فوج تعینات کردی گئی

پشاور ہائی کورٹ نے وزیرِ اعلیٰ خیبرپختونخوا علی امین گنڈا پور کی راہداری ضمانت منظور کر لی ہے۔

چیف جسٹس پشاور ہائی کورٹ اشتیاق ابراہیم نے علی امین گنڈا پور کی 25 اکتوبر تک راہداری ضمانت منظور کی ہے اور کسی بھی مقدمے میں انہیں گرفتار کرنے سے روک دیا ہے۔

پاکستان کے وفاقی وزیرِ اطلاعات عطا اللہ تارڑ نے کہا ہے کہ شنگھائی تعاون تنظیم کا انعقاد پاکستان کے لیے بہت بڑا اعزاز کی بات ہے۔ ایسے موقع پر احتجاج منفی پیغام ہے۔

جمعے کو اپنے ایک پیغام میں وزیرِ اطلاعات نے کہا کہ سی پیک کے آغاز پر بانی پی ٹی آئی نے دھرنا دیا تھا۔ ہمیں پاکستان کا مثبت تشخص دنیا کو دکھانا ہے۔

انہوں نے کہا کہ پارلیمنٹ کے فلور پر احتجاج کیا جائے۔ سڑکوں پر احتجاج سے منفی تاثر جائے گا۔ علی امین گنڈاپور کو مشورہ ہے کہ وہ پشاور جائیں اور ٹرانسپورٹ کے کرائے کم کریں۔

پاکستان تحریکِ انصاف (پی ٹی آئی) کی جانب سے اسلام آباد میں احتجاج کی کال کے بعد کارکن ڈی چوک سمیت مختلف مقامات پر جمع ہو رہے ہیں۔

وائس آف امریکہ کے نمائندے عاصم علی رانا کے مطابق کارکنوں کو منتشر کرنے کے لیے پولیس کی جانب سے شیلنگ بھی کی گئی ہے۔ اسلام آباد شہر میں داخلے کے راستوں پر پولیس نے کنٹینر لگا رکھے ہیں جب کہ بڑی تعداد میں پولیس اہلکار بھی تعینات ہیں۔