ہانگ کانگ: پالتو کتے میں کرونا وائرس کی تصدیق
ہانگ کانگ میں ایک پالتو کتے میں کرونا وائرس کی تصدیق ہوئی ہے جو انسان سے جانور کو یہ وائرس منتقل ہونے کا پہلا معلوم واقعہ ہے۔ ماہرین صحت کہتے ہیں کہ کرونا وائرس پالتو جانوروں کے ذریعےنہیں پھیل سکتا لیکن اس کیس سے یہ انکشاف ہوا ہے کہ وہ متاثر ہو سکتے ہیں۔
یہ کتا ایک ایسے شخص کا تھا جو خود کرونا وائرس کا شکار تھا۔ اسے 26 فروری سے قرنطینہ رکھا گیا ہے۔ گزشتہ ہفتے ہانگ کانگ کے حکام کا خیال تھا کہ کتے کو انفیکشن نہیں ہے بلکہ وہ ماحولیاتی آلودگی کی وجہ سے اس کیفیت کا شکار ہوا ہے۔ لیکن اب ٹیسٹ سے معلوم ہوا کہ اسے کم درجے کا انفیکشن ہے۔ اس میں بیماری کی کوئی علامات ظاہر نہیں ہوئیں جب کہ اسی اسپتال میں ایک اور کتے کا ٹیسٹ منفی آیا۔
ہانگ کانگ حکومت نے کہا ہے کہ اس نے کتے کے کرونا وائرس میں مبتلا ہونے کا اعلان جانوروں کے مقامی ڈاکٹروں اور جانوروں کی صحت سے متعلق عالمی تنظیم سے مشورے کے بعد کیا ہے۔
کرونا وائرس: ایران سے لوگ آ سکتے ہیں تو چین سے کیوں نہیں؟
اسلام ہائی کورٹ نے وفاقی حکومت کو حکم دیا ہے کہ وہ چین میں پھنسے پاکستانی طلبہ کے حوالے سے مناسب فیصلہ کرے۔ طلبہ کے عزیز و اقارب نے اپنی درخواست میں طلبہ کو واپس بلا کر قرنطینہ میں رکھنے کا مطالبہ کیا ہے۔
جمعے کو چین میں پھنسے پاکستانیوں اور طلبہ کے لواحقین کی جانب سے دائر درخواست پر سماعت کے دوران چیف جسٹس اسلام آباد ہائی کورٹ اطہر من اللہ نے کہا کہ والدین کا درد اور دکھ ہم سمجھ رہے ہیں۔
لیکن یہ ایک بڑا معاملہ ہے، عدالت تحریری حکم میں واضح کر چکی ہے کہ اس حوالے سے کوئی حکم نہیں دے سکتے۔
دوران سماعت چین میں موجود طلبہ کے والدین نے کمرہ عدالت میں رونا شروع کردیا اور کہا کہ ایران سے آنے والے ہزاروں زائرین کے لیے کوئٹہ میں الگ جگہ بنا دی گئی۔ ہمارے بچے بھی اسی طرح یہاں لا کر کسی بھی جگہ رکھ لیں۔
لواحقین نے شکوہ کیا کہ ہمارا کوئی احساس کرنے والا نہیں،حکومت کچھ نہیں کر رہی۔ تمام ملکوں نے اپنے بچے نکال لیے لیکن ہمارے بچوں کو واپس نہیں لا رہے۔
چین میں کرونا وائرس سے شرح اموات میں کمی، امریکہ اور یورپ میں اضافہ
چین میں ہر گزرتے دن کے ساتھ کرونا وائرس سے متاثرہ مریضوں اور ہلاکتوں کی تعداد میں کمی واقع ہو رہی ہے۔ اس کے برعکس امریکہ، یورپ اور ایشیا کے بعض متاثرہ ملکوں میں وائرس سے ہلاکتوں اور نئے کیسز کی تعداد میں اضافہ ہوا ہے۔
کرونا وائرس نے جہاں عالمی معیشت کو شدید نقصان پہنچایا ہے وہیں اسکولوں کی بندش کے لگ بھگ 30 کروڑ بچے تعلیم کے حصول سے دور ہیں۔
امریکہ میں ریاست واشنگٹن کے بعد کرونا وائرس دیگر ریاستوں میں بھی تیزی سے پھیل رہا ہے۔ ریاست میری لینڈ میں بھی کرونا وائرس کے تین کیسز کی تصدیق ہوئی ہے جب کہ امریکہ میں کرونا وائرس سے ہلاکتوں کی تعداد 12 تک پہنچ چکی ہے۔
کرونا وائرس کے پیشِ نظر خانۂ کعبہ میں خصوصی انتظامات
کرونا وائرس کے پیشِ نظر خانۂ کعبہ کے گرد خصوصی انتظامات کیے گئے ہیں۔ صحنِ کعبہ کو نمازیوں اور طواف کے لیے مکمل طور پر بند کر دیا گیا ہے جب کہ عمرہ کرنے پر بھی پابندی ہے۔ خانہ کعبہ میں لاکھوں افراد نمازِ جمعہ کی ادائیگی کے لیے آتے ہیں۔ لیکن آج نمازیوں کی تعداد بھی معمول سے کم تھی۔
