اداس شہر میں ایک گیت نے زندگی کی لہر دوڑا دی
لاک ڈاؤن سے متاثر ایک شہر گھوسٹ ٹاؤن بنا ہوا تھا اور رات کے اندھیرے میں گلیاں سنسان پڑی تھیں۔ ایک نوجوان جب گھر میں پڑے پڑے بیزار ہوگیا تو بالکونی میں آیا اور ایک گیت گانا شروع کردیا۔ سامنے والے گھر کی کھڑکی کھلی اور ایک لڑکی نے اس کا ساتھ دینا شروع کردیا۔ کھڑکیاں کھلتی گئیں اور گیت گانے والے بڑھتے گئے۔ کچھ ہی دیر میں اس اداس شہر میں ایک گیت نے زندگی کی لہر دوڑا دی۔
یہ کہانی ہے اٹلی کے شہر سی اینا کی جس کی ویڈیو سوشل میڈیا پر وائرل ہورہی ہے۔ رات ہے، تاریکی ہے، گلی سنسان ہے لیکن گیت گونج رہا ہے۔
تاریخ اور اساطیر کے امین اور فٹبال، فیشن اور موسیقی کے مرکز اٹلی کو کرونا وائرس نے بری طرح متاثر کیا ہے۔ چین کے بعد وہ پہلا ملک ہے جہاں عالمی وبا سے ایک ہزار ہلاکتیں ہوچکی ہیں۔ ایک ایک دن میں دو دو سو زندگیاں ختم ہورہی ہیں۔ پورے ملک میں کرفیو جیسے حالات ہیں اور زندگی معطل ہوکر رہ گئی ہے۔ اس معطل زندگی میں ایک گیت نے بہت سے لوگوں میں جینے کی امنگ پیدا کی ہے۔
اس کی ویڈیو سی اینا کے ایک شہری نے سوشل میڈیا پر پوسٹ کی اور لکھا کہ میرے شہر کے لوگ کرونا وائرس لاک ڈاؤن کے دوران ایک سنسان گلی میں اپنے گھروں سے ایک مقبول لوک گیت گارہے ہیں۔
کرونا وائرس کے روزانہ پانچ ہزار نئے مریض
کرونا وائرس سے دنیا بھر میں پانچ ہزار افراد ہلاک ہو چکے ہیں جب کہ ساڑھے پانچ ہزار مریضوں کی حالت تشویش ناک ہے۔ ہر روز پانچ ہزار سے زیادہ نئے مریض سامنے آ رہے ہیں۔
ویب سائٹ ورڈومیٹر کے مطابق 12 اور 13 مارچ کی درمیانی شب تک پوری دنیا میں کرونا وائرس کے 140044 سے زیادہ کیسز کی تصدیق ہو چکی تھی، 5123 ہلاکتیں ہوئی تھیں جب کہ 70733 افراد صحت یاب ہو گئے تھے۔
اب بھی 64188 مریض اس وائرس میں مبتلا ہیں جن میں سے 5790 کی حالت تشویش ناک ہے۔ نئے کیسز اور ہلاکتوں کا گراف دیکھنے سے اندازہ ہوتا ہے کہ ان میں مسلسل اضافہ ہو رہا ہے۔
ویب سائٹ پر روزانہ کی بنیاد پر اعداد و شمار کو اپ ڈیٹ کیا جاتا ہے۔ اس پر ہر ملک کے نئے کیس، نئی اموات، کل مریض، کل اموات، تشویش ناک مریض، صحت یاب افراد کی تعداد دیکھی جا سکتی ہے۔
پاکستان کے بارے میں بتایا گیا ہے کہ وہاں 22 مریض ہیں۔ گزشتہ روز ایک نیا کیس سامنے آیا۔ 2 افراد صحت یاب ہو چکے ہیں جب کہ 20 کی دیکھ بھال جاری ہے۔
اب تک جن ملکوں میں ایک ہزار سے زیادہ مریض سامنے آ چکے ہیں ان میں چین کے علاوہ اٹلی، ایران، جنوبی کوریا، اسپین، جرمنی، فرانس، امریکہ اور سوئزر لینڈ شامل ہیں۔
چین، اٹلی اور ایران کے بعد اسپین چوتھا ملک ہے جہاں ہلاکتوں کی تعداد سو سے زیادہ ہو گئی ہے۔ چین میں چار ہزار اور اٹلی میں 1100 سے زیادہ مریضوں کی حالت تشویش ناک ہے.
کرونا وائرس کی وجہ سے غیر ملکی سرمائے کا فرار
کرونا وائرس کی وجہ سے دنیا بھر کے سرمایہ کار گھبراہٹ کا شکار ہیں اور اپنے سرمائے کو ان معیشتوں سے نکال رہے ہیں جنھیں وہ غیر محفوظ سمجھتے ہیں۔ گزشتہ ایک ماہ میں ابھرتی ہوئی معیشتوں سے 30 ارب ڈالر نکالے جاچکے ہیں۔ پاکستان کی پہلے سے بدحال معیشت کو بھی جھٹکے لگ رہے ہیں اور صرف 12 دن میں 67 کروڑ ڈالر کا سرمایہ ملک سے رخصت ہوچکا ہے۔
اسٹیٹ بینک آف پاکستان کے مطابق اس رقم میں سے 60 کروڑ ڈالر ٹی بلز سے نکالے گئے ہیں جبکہ پاکستان انویسٹمنٹ بانڈز سے سوا 3 کروڑ ڈالر رخصت ہوگئے ہیں جو ان میں غیر ملکی سرمایہ کاری کا نصف ہے۔ غیر ملکی سرمائے کی آمددرفت سے پاکستانی کرنسی، شرح سود اور قیمتوں پر اثرات مرتب ہوتے ہیں۔ یہی وجہ ہے کہ گزشتہ 3 دن میں امریکی ڈالر کے مقابلے میں پاکستانی روپے کی قدر میں 3 فیصد سے زیادہ کمی ہوئی ہے۔ پیر کو 154 روپے 25 پیسے میں ملنے والے ڈالر کا نرخ جمعرات کو 159 روپے 30 پیسے ہوچکا تھا۔
ماہرین معیشت کا کہنا ہے کہ کرونا وائرس اور تیل کی قیمتوں میں کمی کی وجہ سے سرمایہ کار تیزی سے فیصلے کررہے ہیں۔ عالمی حصص مارکیٹوں میں شدید مندی کا رجحان ہے اور ابھرتی ہوئی معیشتوں سے رقوم منتقل کی جارہی ہیں۔ یہ معیشتیں چھ ہفتوں میں 30 ارب ڈالر سے محروم ہوچکی ہیں۔
کرونا وائرس: ریاست لوزیانا میں پرائمری انتخاب ملتوی
کرونا وائرس کے پھیلاؤ کے پیشِ نظر امریکی ریاست لوزیانا نے ڈیموکریٹک پارٹی کے 4 اپریل کو ہونے والے پرائمری انتخاب کو جون تک ملتوی کرنے کا اعلان کیا ہے۔
لوزیانا پہلی ریاست ہے جس نے کرونا وائرس کا پھیلاؤ روکنے کے لیے الیکشن آگے بڑھانے کا فیصلہ کیا ہے۔ حکام کا کہنا ہے کہ یہ فیصلہ الیکشن میں خدمات انجام دینے والے معمر کارکنوں کا تحفظ یقینی بنانے کے لیے کیا گیا ہے۔
آئندہ منگل کو ریاست ایریزونا، فلوریڈا، الی نوئے اور اوہایو میں پرائمری انتخاب ہونے ہیں اور فی الحال ان ریاستوں نے پرائمریز ملتوی کرنے کا فیصلہ نہیں کیا۔ ان کے بعد 24 مارچ کو جارجیا اور 29 مارچ کو پورٹوریکو میں پرائمری الیکشن ہوں گے۔
