امریکہ نے پاکستان کو مزید دو کروڑ ڈالر امداد دینے کا اعلان کر دیا

امریکہ نے پاکستان میں سیلاب متاثرین کے لیے مزید دو کروڑ ڈالر امداد کا اعلان کیا ہے جس کے بعد امریکہ کی جانب سے مجموعی امداد کا حجم پانچ کروڑ ڈالر ہو گیا ہے۔

اس سے قبل امریکہ نے پاکستان کے لیے تین کروڑ ڈالر امداد کا اعلان کیا تھا۔

امریکی امدادی ادارے یو ایس ایڈ کی منتظمہ سمانتھا پاور نے اپنی ٹویٹ میں بتایا کہ پاکستان میں سیلاب سے بڑے پیمانے پر تباہی ہوئی ہے۔

اقوامِ متحدہ کے سیکریٹری جنرل کا سیلاب سے متاثرہ بلوچستان اور سندھ کا دورہ

پاکستان کے دو روزہ دورے پر آئے اقوامِ متحدہ کے کے سیکریٹری جنرل انتونیو گوتریس نے پاکستان میں سیلاب سے سب سے زیادہ متاثر ہونے والے صوبوں بلوچستان اور سندھ کا دورہ کیا ہے۔

سیکریٹری جنرل انتونیو گوتریس نے ایک بار پھر عالمی برادری سے اپیل کی ہے کہ سیلاب سے متاثرہ پاکستان کی بھرپور مدد کی جائے۔

اُن کا کہنا تھا کہ پاکستان کا گرین ہاؤس گیسز کے اخراج میں حصہ نہ ہونے کے برابر ہے، لیکن اس کے باوجود یہ سیلاب سے سب سے زیادہ متاثر ہوا ہے۔

اُن کا کہنا تھا کہ وہ فوری طور پر کوئی کرشمہ نہیں کر سکتے، لیکن سیلاب زدگان کو یقین دلاتے ہیں کہ اُن کی ہر ممکن مدد کی جائے گی۔

پاکستان کو بڑے پیمانے پر امداد کی ضرورت ہے: یو این سیکریٹری جنرل

اقوامِ متحدہ کے سیکریٹری جنرل انتونیو گوتریس نے کہا ہے کہ دنیا میں لوگ سیلاب اور قحط سے ہلاک ہو رہے لیکن پھر بھی گرین ہاؤس گیسوں کے اخراج میں اضافہ جاری ہے۔ انہوں نے اس رجحان کو اجتماعی خود کشی قرار دیتے ہوئے عالمی برادری سے اپیل کی ہے کہ وہ قدرت کے ساتھ جاری اس جنگ کو روکے۔

پاکستان کے دورے پر آئے ہوئے اقوام متحدہ کے سیکرٹری جنرل انتونیو گوتریس نے پاکستان کے وزیر خارجہ بلاول بھٹو زرداری کے ہمراہ نیوز کانفرنس میں خطاب کرتے ہوئے کہا کہ افریقہ سے لے کر پاکستان تک وہ ممالک موسمیاتی تبدیلی کی بھاری قیمت ادا کررہے جن کا مضر گیسوں کے اخراج میں کوئی کردار نہیں ہے۔

انہوں نے عالمی برادری اور ترقی یافتہ ممالک پر زور دیا کہ گرین ہاؤس گیسوں کے اخراج کو کم قابل تجدید توانائی میں سرمایہ کاری کریں۔

اس موقع پر پاکستا ن کے وزیر خارجہ بلاول بھٹو نے کہا کہ سیلاب کی وجہ سے پاکستان کے کئی شہروں کے پاکستانی عوام نے اس آفت کی وجہ سے سب کچھ کھو دیا جس آفت میں ان کا کوئی کردار نہیں ہے۔

انہوں نے کہا کہ سیلاب سے متاثر ہونے والے لگ بھگ تین کروڑ 30 لاکھ لوگوں کو چھت فراہم کرنے اور ان کی زندگی کو دوبارہ بحال کرنے کے لیے پاکستان کے پاس وسائل نہیں ہیں اور سیلاب سے متاثرہ علاقوں میں وبائی امراض پھیلنے کا خطرہ ہے۔

پاکستان کا ماحولیاتی تبدیلیوں میں حصہ کم، لیکن متاثر زیادہ ہوا: سیکریٹری جنرل اقوامِ متحدہ

اقوامِ متحدہ کے سیکریٹری جنرل انتونیو گوتریس نے کہا ہے کہ پاکستان کا عالمی ماحولیاتی تبدیلیوں میں حصہ کم، لیکن یہ متاثر زیادہ ہوا ہے۔

اسلام آباد میں وزیرِ اعظم شہباز شریف کے ہمراہ نیوز کانفرنس کرتے ہوئے انتونیو گوتریس کا کہنا تھا کہ حکومت ، پاکستانی فوج اور رفاہی تنظیمیں پاکستان میں امدادی سرگرمیوں میں مصروف ہیں۔

انتونیو گوتریس نے دنیا کو مخاطب کرتے ہوئے کہا کہ پاکستان سیلاب سے بہت زیادہ متاثر ہوا ہے۔ آج پاکستان متاثر ہوا ہے تو کل کو کوئی دوسرا ملک موسمیاتی تبدیلیوں سے متاثر ہو سکتا ہے۔ لہذٰا اس کا راستہ روکنے کے لیے سب کو مل کر کام کرنا ہو گا۔

انتونیو گوتریس کا کہنا تھا کہ یہ عالمی برادری کی ذمہ داری ہے کہ ماحول دشمن گیسز کے اخراج کو کم کیا جائے اور ایسے ملکوں کے ساتھ تعاون کیا جائے جو ماحولیاتی تبدیلیوں سے متاثر ہو رہے ہیں۔

اس موقع پر گفتگو کرتے ہوئے وزیرِ اعظم شہباز شریف نے کہا کہ اقوامِ متحدہ کے سیکریٹری جنرل کا دورہ قابلِ ستائش ہے اور امداد پر ان کے شکرگزار ہیں۔