امریکی نائب صدر کاملہ ہیرس جمعے کے روز امریکہ اور میکسیکو کی سرحد کے دورے پر ہیں۔ امریکہ کی پہلی خاتون نائب صدر کا عہدہ سنبھالنے کے بعد وہ پہلی مرتبہ اس صورتِ حال کا جائزہ لے رہی ہیں جسے عشروں میں تارکینِ وطن کی تعداد میں سب سے زیادہ اضافہ سمجھا گیا ہے۔
ان کے دورے کو اس صورتِ حال پر بائیڈن انتظامیہ کے ردِ عمل کے طور پر دیکھا جا رہا ہے۔
ٹیکسس کے شہر ایل پاسو کے دورے کے موقع پر ہوم لینڈ سیکیورٹی کے وزیر ایل ہانڈرو میورکز بھی ان کے ہمراہ تھے۔ اس سے پہلے وہ سینیٹر اور کیلی فورنیا کی اٹارنی جنرل کی حیثیت سے اس جنوبی سرحد کا دورہ کر چکی ہیں۔
اگرچہ وہائٹ ہاؤس نے کہا ہے کہ ان کا دورہ سیاسی نوعیت کا نہیں ہے مگر اس سے پہلے ری پبلکن قانون ساز ان پر سخت تنقید کر رہے تھے کہ وہ نائب صدر کے طور پر اس اہم مسئلے کا خود جائزہ نہیں لے رہیں۔
اس ماہ کے شروع میں ہیرس نے گوئٹے مالا کا دورہ کیا تھا جہاں انہوں نے یہ بتانے کی کوشش کی تھی کہ بائیڈن انتظامیہ ترکِ وطن کی اصل وجہ پر توجہ کا عزم کئے ہوئے ہے۔ وہائٹ ہاؤس ہنڈراس، ایل سلواڈور اور گوئٹے مالا کے ممالک کے اقتصادی اور سیکیورٹی کے مسائل سے نمٹنے کے لئے کئی ارب ڈالر کا امدادی پیکیج تجویز کر رہا ہے۔
بظاہر ان تینوں ملکوں سے تارکینِ وطن کی ایک بڑی تعداد کے امریکی سرحد پر پہنچنے کی وجہ سے امریکہ کو اس مسئلے پر بھر پور توجہ دینا پڑی ہے کیونکہ یو ایس کسٹمز اینڈ بارڈر کنٹرول یا سی بی پی نامی ادارے کے اعداد و شمار سے ظاہر ہوا ہے کہ مئی کے مہینے میں ایک لاکھ 80 ہزار 34 تارکینِ وطن کو امریکہ اور میکسیکو کی سرحد پر پکڑا گیا۔ جب کہ اس سے پہلے اپریل کے مہینے میں یہ تعداد 178,622 تھی۔ان میں زیادہ تر نوجوان تھے جو امریکہ میں داخل ہونا چاہتے تھے۔
مئی کے مہینے میں سی بی پی نے ایک لاکھ 12 ہزار سے زیادہ غیر ملکیوں کو ٹائیٹل 42 نامی ان ہدایات کے تحت سرحد سے ہٹایا جو صدر ٹرمپ نے طے کی تھیں اور جن کے تحت سی بی پی کو کرونا وائرس کی وبا کے پیشِ نظر غیر قانونی تارکینِ وطن کو ملک میں داخل ہونے سے روکنے کا اختیار تھا۔
مگر صدر بائیڈن کے اقتدار میں آنے کے بعد بائیڈن انتظامیہ نے ان ہدایات میں ترمیم کر کے کم عمر بچوں کو خاندان کے بغیر اور چھوٹے بچوں کے ہمراہ آنے والے خاندانوں کو امریکہ میں پناہ حاصل کرنے کی کوشش کی اجازت دے دی۔ جس کے بعد مئی میں امریکی حکام کو 10 ہزار سے زیادہ ایسے بچوں سے نمٹنا پڑا جن کے ساتھ خاندان کا کوئی بڑا فرد نہیں تھا۔ اپریل میں یہ تعداد 13 ہزار 9 سو سے بڑھ گئی تھی۔
23 جون تک امریکہ کے محکمہ ہوم لینڈ سیکیورٹی کی تحویل میں ایسے بچوں کی تعداد 16 ہزار کے قریب ہو گئی ہے۔
اپنے دورے کے موقع پر کاملہ ہیرس کو ایل پاسو میں امریکی فوج کی فورٹ بلس نامی بیس پر ایک ہنگامی شیلٹر میں رکھے گئے ان بچوں سے ملنے کا بھی موقع ملے گا۔
متعدد نیوز رپورٹس میں اس تنصیب پر غیر انسانی اور انتہائی افسوسناک حالات کی تفصیل بیان کی گئی ہے
اس ہفتے کے شروع میں بی بی سی کی ایک رپورٹ میں وہاں گنجائیش سے زیادہ بچوں کو رکھے جانے، متعدی امراض کے لئے صحت کی سست اور ناکافی سہولتوں اور صاف کپڑوں اور مناسب غذا کی قلت کی تفصیل بیان کی گئی تھی۔
عدالت میں دی گئی درخواستوں میں ترکِ وطن کرنے والے ان بچوں میں جسمانی اور جذباتی نوعیت کی سخت مایوسی اور پریشانی کا ذکر کیا گیا ہے جو ان نو عمر بچوں میں خودکشی کے خطرے کا باعث بھی بنی ہے۔
اس ماہ کے شروع میں عدالت میں فائل کی گئی دستاویزات میں ہنڈراس سے تنہا آنے والے ایک 13سالہ تارک وطن نے بتایا،
" مجھے نائلون کے ایک بڑے سفید خیمے میں رکھا گیا جو اتنا ٹھنڈا تھا کہ ہم اسے فریزر کہتے تھے۔ بہت مرتبہ ہمیں ایسی مرغی کھانے کو دی گئی جو پوری طرح پکی ہوئی بھی نہیں تھی۔ ایک مرتبہ تو اس میں سے پر بھی پوری طرح الگ نہیں کئے گئے تھے"۔
فورٹ بلس کی اس تنصیب پر پہلے پہل یہ مائیگرینٹ بچے ٹرمپ انتظامیہ کے دور میں رکھے گئے تھے۔
بدھ کے روز ہوم لینڈ سیکیورٹی کے ایک ترجمان نے بتایا ہے کہ ان کے محکمے نے فورٹ بلس اور دیگر تمام ہنگامی مراکز پر صورتِ حال بہتر بنانے کے لئے اقدامات کئے ہیں۔
وائس آف امریکہ کو ایک ای میل میں ترجمان نے بتایا ہے کہ اب بچوں کو بہتر کھانا دیا جا رہا ہے اور فورٹ بلس اور دیگر تمام ہنگامی مراکز پر ذہنی صحت کے 50 سے زیادہ ماہرین تعینات کر دیے گئے ہیں۔
امریکی قانون کے تحت، اپنے ملکوں میں نسل، مذہب، قومیت، سیاسی نظریات یا کسی مخصوس گروپ سے وابستگی پر امتیازی سلوک اور جبر کا شکار ہونے والے لوگوں کو اسائلم یا پناہ فراہم کی جا سکتی ہے
مگر پناہ کی تمام درخواستیں سرحد پر پہنچنے والے لوگوں ہی کی طرف سے نہیں دی جاتیں بلکہ وہ لوگ بھی جو کسی طرح امریکہ میں داخل ہو جاتے ہیں، ایک سال کے اندر اندر پناہ کی درخواست دے سکتے ہیں یا بے دخلی سے بچنے کے لئے عدالت سے رجوع کر سکتے ہیں۔
امریکہ کی سراکیوز یونیورسٹی میں امیگریشن کورٹس کے اعداد و شمار کے تحقیقی سنٹر کے مطابق 2021 میں اسائلم کے 15320 کیسز نمٹائے گئے جن میں سے 10578 کیسز مسترد جب کہ صرف 4,488 کے حق میں فیصلہ دیا گیا۔
امریکہ کی میکسیکو سے ملنے والی اس سرحد پر تارکینِ وطن کے ہجوم کو روکنے کے لئے سابق صدر ٹرمپ نے ایک دیوار کی تعمیر شروع کی تھی۔
مگر صدر بائیڈن نے منصبِ صدارت سنبھالتے ہی اس کی تعمیر روک دی تھی اور دو ارب ڈالر کے وہ فنڈز بھی واپس کر دیے تھے جو سابق صدر ٹرمپ نے اس مقصد کے لئے امریکی محکمہ دفاع پنٹاگان سے حاصل کئے تھے۔
لیکن اب ہوم لینڈ سیکیورٹی کے وزیر میورکز نے کانگریس میں ایک بیان میں کہا ہے کہ بائیڈن انتظامیہ اس دیوار کی تعمیر کا دوبارہ جائزہ لے رہی ہے تاکہ سرحد کی بہتر حفاظت کو یقینی بنایا جا سکے۔
