آسٹریلیا دوسرا کرکٹ ٹیسٹ بھی ہار گیا

بدھ کو بنگلور میں کھیلے جانے والے دوسرے کرکٹ ٹیسٹ میچ کے آخری روز بھارت نے آسٹریلیا کو سات وکٹوں سے شکست دے کرسیریز دو،صفرسے جیت لی ۔

میزبان ٹیم کو میچ جیتنے کے لیے 207 رنز کا ہدف ملا تھا جو اُس نے تین کھلاڑیوں کے نقصان پر پور ا کرلیا ۔ پہلی اننگز میں ڈبل سنچر ی بنانے والے مایہ ناز بھارتی بلے باز سچن ٹنڈولکر نے دوسری اننگز میں 53 رنز بنائے اور آؤٹ نہیں ہوئے۔

آسٹریلیا نے پہلی اننگز میں 478 رنز بنائے تھے جس کے جواب میں بھارت کی ٹیم 495 رنز بنا کر آؤٹ ہو گئی۔ لیکن دوسری اننگز میں بھارتی باؤلروں نے شاندار کارکردگی کا مظاہرہ کیا اور مہمان ٹیم کو 223 کے مجموعی ا سکور پر ڈھیر کردیا۔

بھارت نے موہالی میں کھیلا جانے والاپہلا ٹیسٹ میچ سنسنی خیز مقابلے کے بعد ایک وکٹ سے جیت لیا تھا۔