ايران سومر ڏينهن چيو آهي ته ان باضابطه طور تي سعودي بادشاه کي ايران جي دوري جي دعوت ڏني آهي، جنهن کان اڳ ۾ پوئين مهيني ٻنهي جي وچ ۾ مفاهمتي سمجهوتو ٿيو هو.
سال 2016 ۾ سعودي عرب تهران جي سفارت خاني ۽ ملڪ جي اتر اولهه واري شهر مشهد ۾ قائم سندس قونصل خاني تي ٿيڻ وارن حملن کان پوءِ تعلقات منقطع ڪري ڇڏيا هيا، اهو احتجاج رياض پاران شيعه عالم نمر النمر کي ڦاسي ڏيڻ کان پوءِ پيش آيو هو.
وچ اوڀر جي انهن وڏن ملڪن جي وچ ۾ عراق ۽ عمان ۾ ڳالهين جا ڪئين دور ٿيڻ کان پوءِ ٻنهي جي وچ ۾ ڏهين مارچ تي چين ۾ ناتا بحال ڪرڻ جو سمجهوتو ٿيو هو.
سومر ڏينهن ايران جي پرڏيهي وزارت جي ترجمان، ناصر ڪنانيءَ چيو ته صدر ابراهيم رئيسي ’’سعودي بادشاه کي ايران اچڻ جي دعوت ڏني آهي’’.
ڪناني ٻڌايو ته ايراني صدر کي اڳ ۾ ئي سني حڪمرانيءَ واري ملڪ جي دوري جي دعوت ملي چڪي آهي.
ترجمان ان اميد جو اظهار ڪيو ته ايران ۽ سعودي عرب 9 مئي تي پنهنجا سفارتي مشن ٻيهر کوليندا، جيئن چين جي ٽياڪڙيءَ ۾ ٿيڻ واري سمجهوتي ۾ طئي ڪيو ويو آهي.
هن هفتي وار اخباري ڪانفرنس ۾ ٻڌايو ته ’’اسان ۽ سعودي ڌر بروقت سفارت خانا بحال ڪرڻ گهرئون ٿا ته جيئن ايراني حج ادا ڪرڻ جي لاءِ سعودي عرب وڃي سگهن، جن کي سفارت خانو وقت سر گهربل خدمتون فراهم ڪري سگهي’’.
ساليانو حج جيڪو اسلام جو اهم ستون آهي، اهو هن سال جون جي آخر ۾ ٿيندو.
ڇهين اپريل تي ايراني ۽ سعودي پرڏيهي وزير حسين امير عبدالهيان ۽ شهزادو فيصل بن فرحان بيجنگ ۾ ڳالهه ٻولهه ڪئي ته جيئن ناتن بحال ڪرڻ جي معاملي تي عمل درآمد ڪيو وڃي.
ترجمان چيو ته سفارت خانا کولڻ کان اڳ ٻنهي ملڪن جا پرڏيهي وزير هڪ دفعو ٻيهر ملاقات ڪندا.
(خبر ۾ شامل مواد ايجنسي فرانس پريس تان ورتو ويو آهي)
