صدر ابراہیم رئیسی کی ہیلی کاپٹر حادثے میں ہلاکت، ایران میں پانچ روزہ سوگ کا اعلان

ایران کے صدر ابراہیم رئیسی کی ہیلی کاپٹر حادثے میں موت کے بعد عالمی رہنماؤں کی جانب سے تعزیتی بیانات کا سلسلہ جاری ہے۔

پاکستان کے صدر آصف علی زرداری، وزیرِ اعظم میاں محمد شہباز شریف نے بھی تعزیتی بیانات جاری کیے ہیں۔

صدر آصف زرداری کا بیان میں کہنا تھا کہ صدر ابراہیم رئیسی امتِ مسلمہ کے اتحاد کے بڑے حامی تھے۔ عالمِ اسلام ایک عظیم رہنما سے محروم ہو گیا۔

بھارت کے وزیرِ اعظم نریندر مودی نے بھی صدر ابراہیم رئیسی کی موت پر افسوس کا اظہار کیا۔

اس کے علاوہ تھائی لینڈ کے وزیرِ اعظم، عراق کے وزیرِ اعظم، مالدیپ کے وزیرِ خارجہ سمیت دیگر ممالک کی اعلیٰ شخصیات نے بھی بیان جاری کیے ہیں۔

ہیلی کاپٹر حادثے میں ایران کے صدر ابراہیم رئیسی کی ہلاکت کے بعد ایران میں آئینی طور پر انتقال اقتدار کے مراحل کا آغاز ہوجائے گا۔

اسلامی جمہوریہ ایران کے آئیں کے آرٹیکل 131 کے مطابق اگر صدر کا اتنقال ہوجائے تو ایران کے سپریم لیڈر کی منظوری سے فرسٹ نائب صدر ان کی ذمے داریاں سنبھال لیں گے۔ ایران میں منتخب صدر کے علاوہ ایک سے زائد نائب صدور مقرر کیے جاتے ہیں۔

اس وقت ایران کے فرسٹ نائب صدر 69 سالہ محمد مخبر ہیں جو ہیلی کاپٹر کے حادثے کے بعد سے صدر کی ذمے داریاں ادا کررہے ہیں۔

صدر کی موت کی تصدیق کے بعد نئے صدر کے انتخاب کے لیے ایک پانچ رکنی کونسل تشکیل دی جاتی ہے جس میں فرسٹ نائب صدر، اسپیکر پارلیمنٹ اور عدلیہ کے سربراہ بھی شامل ہوتے ہیں۔ یہ کونسل 50 روز کے اندر اندر انتخابات منعقد کرائے گی۔

عام حالات میں ایران میں ہر چار سال بعد صدر کا انتخاب کیا جاتا ہے۔

صدر ابراہیم رئیسی 2021 کے الیکشن میں منتخب ہوئے تھے۔ ایران میں آئندہ صدارتی انتخاب 2025 میں منعقد ہونا تھا۔

مزید جانیے

ایران کے سرکاری میڈیا نے ہیلی کاپٹر حادثے میں صدر ابراہیم رئیسی اور دیگر اعلیٰ حکام کی ہلاکت کی تصدیق کر دی ہے۔

رپورٹس کے مطابق ہیلی کاپٹر میں سوار تمام افراد حادثے میں ہلاک ہو گئے ہیں۔

ایرانی میڈیا کا کہنا ہے کہ صدر کے ساتھ ہیلی کاپٹر میں ایرانی وزیرِ خارجہ حسین امیر عبد الہیان، ایرانی صوبے مشرقی آذربائیجان کے گورنر مالک رحمتی، مشرقی آذربائیجان میں ایرانی سپریم لیڈر کے نمائندے سید محمد علی آل ہاشم سمیت دیگر اعلیٰ حکام سوار تھے۔

ایران کے سرکاری میڈیا نے رپورٹ کیا ہے کہ صدر ابراہیم رئیسی، وزیرِ خارجہ حسین امیر عبدالہیان سمیت اعلیٰ حکام ہیلی کاپٹر حادثے میں ہلاک ہو گئے ہیں۔

میڈیا رپورٹس میں مزید کہا گیا ہے کہ خراب موسم کے سبب صوبہ مشرقی آذربائیجان میں ورزقان کے علاقے کے قریب ہیلی کاپٹر کو حادثہ پیش آیا۔

تباہ شدہ ہلی کاپٹر کی تلاش اتوار کی شام سے جاری تھی۔ پیر کی صبح امدادی رضا کاروں نے تباہ شدہ ہیلی کاپٹر کے ملنے کا اعلان کیا تھا۔

بعد ازاں یہ رپورٹس بھی سامنے آئی تھیں کہ صوبہ مشرقی آذربائیجان کے دشوار گزار پہاڑی علاقے میں شدید دھند کے سبب امدادی کاموں میں مشکلات پیش آ رہی ہیں جب کہ امدادی رضاکاروں نے مطلع کیا تھا کہ حادثے کے مقام پر زندگی کے آثار موجود نہیں ہیں۔

رپورٹس کے مطابق صدر سمیت دیگر اعلیٰ حکام کو لے جانے والا ہیلی کاپٹر حادثہ میں مکمل طور پر جل چکا تھا۔