مغربی کنارے میں اسرائیلی فوجیوں کے ہاتھوں دو فلسطینی ہلاک

فلسطین میں حکام نے کہا ہے کہ مغربی کنارے کے ایک مہاجر کیمپ میں اسرائیلی فوجیوں کے ساتھ جھڑپ میں دو فلسطینی ہلاک ہوگئے۔

حکام کے مطابق پیر کو قلندیہ کیمپ میں ہونے والی جھڑپ جس میں نوجوانوں کی طرف سے فوجیوں پر پتھراؤ بھی کیا گیا، کے بعد فوجیوں کی فائرنگ سے دو افراد ہلاک ہوگئے۔

اسرائیلی فوج کا کہنا ہے کہ اس نے کیمپ میں گرفتاری کی غرض سے چھاپہ مارا جس کے دوران یہ لڑائی شروع ہوئی اور اس میں پانچ اسرائیلی فوجی زخمی بھی ہوئے۔