ایران نے اسرائیل پر حملے میں کس قسم کے میزائل استعمال کیے؟
ایران کی جانب سے منگل کو اسرائیل پر کم از کم 180 میزائل داغے گئے جس سے کچھ مقامات پر نقصان ہوا اور راکٹ سے گرنے والے پرزوں سے آگ بھی لگی۔لیکن اسرائیلی حکام کا کہنا ہے کہ ان حملوں میں کوئی شخص ہلاک نہیں ہوا۔ ایک اسرائیلی سیکیورٹی عہدے دار کا کہنا ہے کہ زیادہ تر میزائلوں کو روک لیا گیا جب کہ کچھ زمین پر بھی گرے۔
خبر رساں ادارے 'ایسوسی ایٹڈ پریس' کے مطابق ایران کے سرکاری میڈیا نے کہا ہے کہ اسرائیل پر حملے میں کئی قسم کے بیلسٹک میزائل استعمال کیے گئے۔ ان میزائلوں میں 'عماد' اور 'قدر' کے ساتھ ساتھ ایران کا نیا میزائل 'فتح' بھی شامل تھا۔
حکام نے گزشتہ برس یہ دعویٰ کیا تھا کہ 'فتح' کی رفتار آواز کی رفتار سے 15 گنا تیز ہے اور یہ 1400 کلو میٹر تک مار کر سکتا ہے۔
اسرائیلی فوج کا لبنان کے 24 دیہات خالی کرنے کا حکم
اسرائیلی فوج نے جنوبی لبنان کے 24 دیہات کے مکینوں کو ہدایت کی ہے کہ وہ علاقہ خالی کر دیں۔
خبر رساں ادارے 'ایسوسی ایٹڈ پریس' کے مطابق اسرائیل نے لبنانی عسکری تنظیم حزب اللہ کو نشانہ بنانے کے لیے لبنان کے جنوبی علاقوں میں منگل کو 'محدود پیمانے پر' زمینی کارروائی کا آغاز کیا تھا۔
اسرائیل نے بدھ کو جن دیہات کو خالی کرنے کی ہدایت کی ہے انہیں اقوامِ متحدہ بفر زون قرار دے چکی ہے۔
اسرائیل اور حزب اللہ کے درمیان 2006 میں ہونے والے تصادم کے بعد اقوامِ متحدہ نے لبنان کے جنوب میں ایک وسیع علاقے کو بفر زون قرار دیا تھا۔
اسرائیل پر بیلسٹک میزائل حملہ دفاع میں کیا گیا، ایران
ایران کی وزارتِ خارجہ نے اسرائیل پر منگل کو کیے جانے والے بیلسٹک میزائل حملے کو دفاع میں کیا جانے والا حملہ قرار دیا ہے۔
خبر رساں ادارے 'ایسوسی ایٹڈ پریس' کے مطابق ایرانی وزیرِ خارجہ عباس عراقچی نے بدھ کو تہران میں ٹی وی انٹرویو کے دوران کہا کہ " ہم نے سوئٹزرلینڈ کے سفارت خانے کے ذریعے امریکہ کو پیغام دیا ہے کہ وہ تنازع میں مداخلت نہ کرے۔
انہوں نے کہا کہ اگر اسرائیل کی حمایت میں کوئی بھی تیسرا فریق ہمارے خلاف کسی بھی قسم کے آپریشن کا حصہ بنا تو تہران کی جانب سے شدید ردِعمل آئے گا۔
ایرانی وزیرِ خارجہ نے مزید کہا کہ اگر اسرائیل نے ایران پر حملہ کیا تو اس کا جواب زیادہ سخت آئے گا۔
بھارت کا اپنے شہریوں کو ایران کا سفر نہ کرنے کی ہدایت
بھارت نے مشرقِ وسطیٰ میں کشیدگی پر تحفظات کا اظہار کرتے ہوئے اپنے شہریوں کو خبردار کیا ہے کہ وہ ایران کا سفر نہ کریں۔
بھارت کی وزارتِ خارجہ نے بدھ کو جاری ایک بیان میں کہا ہے کہ بھارتی شہری ایران کا سفر کرنے سے گریز کریں اور وہ شہری جو پہلے سے ایران میں موجود ہیں انہیں ہدایت کی جاتی ہے کہ وہ تہران میں سفارت خانے سے رابطے میں رہیں۔
بیان میں کہا گیا ہے کہ یہ ضروری ہے کہ تنازع بڑے پیمانے پر علاقائی تصادم کا باعث نہ بنے۔ نئی دہلی سفارت کاری اور مذاکرات کے لیے تمام مسائل کے حل پر زور دیتا ہے۔