ہمیں یا اسرائیل کو ٹارگٹ نہ کریں: امریکہ کا ایران کو انتباہ

منگل کو ایران کے اسرائیل پر حملے کے بعد فرانس اور اسرائیل کی درخواست پر بلایا گیا سلامتی کونسل کا اجلاس جاری ہے۔

اقوامِ متحدہ کے سیکریٹری جنرل انتونیو گوتریس نے اجلاس سے خطاب کے دوران فریقین پر زور دیا ہے کہ وہ کشیدگی کم کرنے کے لیے کام کریں۔

اجلاس سے خطاب کرتے ہوئے اقوامِ متحدہ میں امریکہ کی سفیر لنڈا تھامس گرین فیلڈ نے کہا کہ سلامتی کونسل کو ایران کے بلا اشتعال حملے کی مذمت کرنی چاہیے۔

اُن کا کہنا تھا کہ امریکہ اور اسرائیل کے درمیان تعاون کی وجہ سے ایران اپنے حملوں کے ذریعے مطلوبہ مقاصد حاصل نہیں کر سکا۔

امریکی سفیر نے کہا کہ اب وقت آ گیا ہے کہ ایران کے پاسدارانِ انقلاب پر مزید پابندیاں عائد کی جائیں۔

لبنان کی عسکری تنظیم حزب اللہ نے دعویٰ کیا ہے کہ جنوبی لبنان میں اسرائیلی فورسز کے ساتھ جھڑپوں میں تین ٹینک تباہ کر دیے گئے ہیں۔

حزب اللہ کے مطابق جنوبی لبنان کے مختلف علاقوں میں اسرائیلی فورسز کے ساتھ لڑائی جاری ہے۔

خبر رساں ادارے 'رائٹرز' کی ایک رپوٹ کے مطابق ایران کے سپریم لیڈر آیت اللہ علی خامنہ ای نے حزب اللہ کے مقتول سربراہ حسن نصراللہ کو خبردار کیا تھا کہ اسرائیل نے اُنہیں مارنے کا منصوبہ بنایا ہے۔

رپورٹ کے مطابق پیجر دھماکوں کے بعد سپریم لیڈر نے اپنے ایک پیغام رساں کے ذریعے حسن نصراللہ کو پیغام بھیجا تھا کہ وہ تہران آ جائیں۔

رپورٹ میں کہا گیا ہے کہ آیت اللہ علی خامنہ ای نے انٹیلی جینس ذرائع سے ملنے والی رپورٹس کے بعد حسن نصراللہ کو پیغام دیا تھا کہ اسرائیل کے کچھ جاسوس حزب اللہ کی صفوں میں موجود ہیں۔

رپورٹ کے مطابق یہ پیغام رساں ایرانی پاسدارانِ انقلاب کے ایک سینئر کمانڈر تھے۔

اسرائیلی فوج نے تصدیق کی ہے کہ لبنان میں زمینی کارروائی کے دوران اس کے آٹھ فوجی مارے گئے ہیں۔

خبر رساں ادارے 'ایسوسی ایٹڈ پریس' کے مطابق بدھ کو اسرائیلی فوج کی جانب سے جاری کیے گئے بیان میں کہا گیا ہے کہ جنوبی لبنان میں حزب اللہ کے ساتھ لڑائی کے دو مختلف واقعات میں یہ ہلاکتیں ہوئی ہیں۔