ہمیں یا اسرائیل کو ٹارگٹ نہ کریں: امریکہ کا ایران کو انتباہ

لبنان کی عسکری تنظیم حزب اللہ نے دعویٰ کیا ہے کہ اس نے سرحدی علاقے میں جھڑپوں کے بعد اسرائیلی فورسز کو پیچھے ہٹنے پر مجبور کر دیا ہے۔

خبر رساں ادارے 'رائٹرز' کے مطابق حزب اللہ نے ایک بیان میں کہا ہے کہ لبنان کے علاقے ادیسہ میں بدھ کی علی الصباح اسرائیلی فورسز کے ساتھ جھڑپیں ہوئی ہیں جس کے نتیجے میں اسے پیچھے دھکیل دیا گیا ہے۔

اسرائیل نے منگل کو لبنان کے سرحدی علاقوں میں زمینی کارروائی شروع کی تھی اور کہا تھا کہ پیادہ فوجیوں کو فضائیہ اور آرٹلری کی مدد بھی حاصل ہے۔

اسرائیل پر میزائل حملوں کے بعد ایران نے امریکہ سے کہا ہے کہ وہ تنازع میں مداخلت سے باز رہے۔

خبر رساں ادارے 'رائٹرز' نے ایران کی مقامی نیوز ایجنسی تسنیم کے حوالہ دے کر رپورٹ کیا ہے کہ ایرانی وزیرِ خارجہ کا کہنا ہے کہ تہران امریکہ کو خبردار کرتا ہے کہ وہ معاملے سے دور رہے۔

ایران نے منگل کی شام اسرائیل پر 180 سے زائد میزائل فائر کیے تھے۔ اسرائیل کا دعویٰ ہے کہ اس نے بیشتر میزائل فضا میں ہی مار گرائے ہیں تاہم کچھ میزائل زمین پر گرے ہیں۔

سوشل میڈیا پر ایران کے میزائل حملوں کی متعدد ویڈیوز وائرل ہیں جن کی آزاد ذرائع سے تصدیق کیا جانا مشکل ہے۔

ایران نے منگل کی شب اسرائیل پر متعدد میزائل داغے جس کا منظر ایک شہری نے کیمرے کی آنکھ میں قید کر لیا۔ ویڈیو میں دیکھا جا سکتا ہے کہ تل ابیب سائرن اور دھماکوں سے گونج رہا ہے۔ اسرائیل کا کہنا ہے کہ ایران کی جانب سے 180 سے زائد میزائل داغے گئے جنہیں تباہ کرنے کے لیے ایئر ڈیفنس سسٹم فعال تھا۔ امریکہ کے محکمہ دفاع پینٹاگون کا کہنا ہے کہ امریکی بحریہ کے جنگی جہازوں نے اسرائیل کی طرف بڑھنے والے ایرانی میزائلوں کے خلاف ایک درجن کے قریب انٹرسیپٹرز فائر کیے۔ تاہم ایرانی حملوں میں کتنا جانی نقصان ہوا ہے اس بارے میں کوئی تفصیلات سامنے نہیں آئی ہیں۔

آسٹریلیا کے وزیرِ اعظم انتھونی البانیز نے اسرائیل پر ایرانی حملے کی مذمت کرتے ہوئے کشیدگی کے خاتمے پر زور دیا ہے۔

خبر رساں ادارے 'ایسوسی ایٹڈ پریس' کے مطابق منگل کو میلبرن میں صحافیوں سے بات کرتے ہوئے وزیرِ اعظم البانیز نے کہا کہ ہمیں ایرانِ کے اقدام پر تحفظات ہیں جس کی وجہ سے ہم اس کی مذمت کرتے ہیں۔

آسٹریلوی وزیرِ اعظم نے کہا کہ یہ اچھا ہے کہ اسرائیل کے دفاعی نظام نے یقینی بنایا ہے کہ حملے کے نتیجے میں کسی انسانی جان کا نقصان نہیں ہوا۔ اس خطے میں پہلے ہی بہت سی جانیں ضائع ہو چکی ہیں۔

البانیز نے مزید کہا کہ اسرائیل کو اپنے دفاع کا حق حاصل ہے۔ ہم اپنے اتحادی امریکہ اور دیگر دوست ملکوں کے ساتھ مل کر خطے میں کشیدگی کے خاتمے کے لیے مسلسل زور دیتے رہے ہیں۔