براہِ راست حسن نصراللہ کی ہلاکت کی تصدیق، حزب اللہ کا اسرائیل کے خلاف کارروائیاں جاری رکھنے کا اعلان

ترکیہ کے صدر رجب طیب ایردوان نے کہا ہے کہ اسرائیل کے بیروت پر حملے کی مذمت کرتے ہوئے کہا ہے کہ ترکیہ لبنان کے عوام اور حکومت کے ساتھ کھڑا ہے۔

صدر ایردوان نے ہفتے کو سماجی رابطے کی سائٹ ایکس پر ایک بیان میں حسن نصر اللہ کا نام لیے بغیر اسرائیلی حملے میں ہلاک ہونے والوں کے متاثرین کے ساتھ اظہارِ یکجہتی کیا۔

انہوں نے کہا کہ اسرائیل کے لبنان پر حالیہ حملے نسل کشی، قبضے اور حملے کی پالیسی کا تسلسل ہے۔

لبنانی عسکری تنظم حزب اللہ کے سربراہ حسن نصراللہ کی ہلاکت کے بعد تنظیم کو نئی قیادت کے انتخاب کا چیلنج درپیش ہے۔

بیالیس سالہ ہاشم صفی الدین کو حسن نصراللہ کا جانشین سمجھا جاتا تھا جو نہ صرف تنظیم کی ایگزیکٹو کونسل کے سربراہ ہیں بلکہ وہ حزب اللہ کے بیرون ممالک سیاسی امور کو بھی دیکھتے ہیں۔

ہاشم صفی الدین حزب اللہ کے ملٹری آپریشنز کو منظم کرنے والی 'جہاد کونسل' میں اٹھتے بیٹھتے ہیں۔ امریکہ کے محکمۂ خارجہ نے انہیں 2017 میں دہشت گرد قرار دیا تھا۔

ہاشم صفی الدین حسن نصراللہ کے کزن ہیں اور وہ انہی کی طرح سیاہ رنگ کا امامہ پہنتے ہیں۔ ان کے عوامی خطابات میں حزب اللہ کی عسکریت پسندانہ مؤقف اور فلسطینی کاز سے حمایت جھلکتی ہے۔

ایران کی حمایت یافتہ لبنان کی عسکری تنظیم حزب اللہ کے سربراہ حسن نصر اللہ کی اسرائیلی حملے میں ہلاکت پر ردِعمل آنے کا سلسلہ جاری ہے۔

خبر رساں ادارے 'رائٹرز' کے مطابق ایران کی وزارتِ خارجہ نے کہا ہے کہ نصر اللہ کا "سفر جاری رہے گا اور یروشلم کی آزادی کی صورت میں ان کا مقصد حاصل کیا جائے گا۔"

اسرائیل کی فوج نے حسن نصر اللہ کی ہلاکت پر کہا ہے کہ "نصر اللہ اب دنیا کو دہشت زدہ نہیں کر سکیں گے۔"

عراق کے وزیرِ اعظم آفس نے لبنان کی عسکری تنظیم کے سربراہ کی ہلاکت پر تین روزہ سوگ کا اعلان کیا ہے۔

فلسطینی عسکری تنظیم حماس کا کہنا ہے کہ نصر اللہ کی ہلاکت صرف ان کی مزاحمت کو مضبوط کرے گی۔

یمن میں حزب اللہ کے اتحادی حوثی باغیوں نے کہا ہے کہ "مزاحمت نہیں ٹوٹے گی اور لبنان اور دیگر محاذوں پر مجاہدین بھائیوں کا جہادی جذبہ مضبوط اور بڑھتا جائے گا۔"

ایران کی حمایت یافتہ لبنان کی عسکری تنطیم حزب اللہ نے گروپ کے سربراہ حسن نصراللہ کی ہلاکت کی تصدیق کر دی ہے۔

خبر رساں ادارے 'ایسوسی ایٹڈ پریس' کے مطابق حزب اللہ نے ہفتے کو ایک بیان میں کہا ہے کہ "حسن نصراللہ اپنے ساتھی شہدا میں شامل ہو گئے ہیں۔"

حزب اللہ نے بیان میں اس عزم کا اظہار کیا ہے کہ اسرائیل کے خلاف کارروائیاں جاری رہیں گی۔

حسن نصراللہ نے 1992 میں حزب اللہ کی قیادت سنبھالی تھی اور وہ گزشتہ تین دہائیوں سے زائد عرصے سے تنظیم کے امور دیکھ رہے تھے۔ ان کی موت مشرقِ وسطیٰ میں ڈرامائی طور پر تنازع کو ایک نئی شکل دے سکتی ہے۔