براہِ راست اسرائیل کا حزب اللہ کے 15 جنگجوؤں کی ہلاکت کا دعویٰ، ایران میں فلائٹ آپریشن بحال

ایران نے کہا ہے کہ اسرائیل پر اس کے حملے کی مذمت میں جاری کیا گیا جی سیون ممالک کا بیان ’متعصابانہ اور غیر ذمے دارانہ‘ ہے۔

وزارتِ خارجہ کے ترجمان کا کہنا ہے کہ جی سیون ممالک اور خاص طور پر امریکہ جارحیت کرنے والے فریق (اسرائیل) کی دفاعی، مالی اور سیاسی مدد کرنے کی پالیسی کی وجہ سے مغربی ایشیا میں عدم استحکام کے ذمے دار ہیں۔

ایران نے اسرائیل پر حملے کے خلاف احتجاج کے لیے جرمنی اور آسٹریا میں اپنے سفیر کی طلبی پر بھی ردِ عمل دیا ہے۔

ایرانی سرکاری میڈیا کے مطابق جمعرات کو تہران میں ان ملکوں کے سفیروں کو بھی جواباً طلب کیا گیا ہے۔

اسرائیل کی فوج نے دعویٰ کیا ہے کہ اس نے غزہ کی پٹی میں لگ بھگ تین ماہ قبل حماس کے ایک سینیئر رہنما سمیت تین کمانڈرز کو ہلاک کردیا تھا۔

بیان میں کہا گیا ہے شمالی غزہ میں زیرِ زمین کمپاؤنڈ پر کیے گئے ایک حملے میں روحی مشتہی اور دیگر دو کمانڈر سامح السراج اور سامح عودہ ہلاک ہوگئے تھے۔ حماس نے اس بیان پر تاحال کوئی تبصرہ نہیں کیا ہے۔

اسرائیلی فوج کا کہنا ہے کہ تینوں کمانڈرز نے غزہ کے ایک زیرِ زمین کمپاؤنڈ میں پناہ لے رکھی تھی جسے وہ کمانڈ اینڈ کنٹرول سسٹم کے طور پر استعمال کر رہے تھے۔

اسرائیلی فوج نے جنوبی لبنان میں کارروائی کے دوران لبنانی عسکری تنظیم حزب اللہ کے 15 جنگجوؤں کو ہلاک کرنے کا دعویٰ کیا ہے۔

اسرائیلی فوج نے جمعرات کو جاری ایک بیان میں کہا ہے کہ جنوبی لبنان کے علاقے بنت جبیل میں میونسپلٹی بلڈنگ پر حملے کے نتیجے میں حزب اللہ کے کم از کم 15 جنگجو مارے گئے ہیں۔

امیرِ قطر شیخ تمیم بن حمد الثانی نے کہا ہے کہ فلسطین کی ریاست کے قیام کے بغیر خطے میں امن نہیں آسکتا۔

خبر رساں ادارے 'رائٹرز' کے مطابق جمعرات کو دوحہ میں ایشیا کوآپریشن ڈائیلاگ سمٹ سے خطاب کرتے ہوئے امیرِ قطر نے کہا کہ مشرقِ وسطیٰ کا بحران 'اجتماعی نسل کشی' ہے اور ان کا ملک اسرائیل کے 'استثنیٰ' سے متعلق خبردار کرتا رہا ہے۔

شیخ تمیم نے لبنان پر اسرائیل کے فضائی حملوں اور ملٹری آپریشن کی بھی مذمت کی۔