لبنان میں بفر زون سے انخلاء کی اسرائیل وارننگ میں توسیع، کیا یہ وسیع حملے کا اشارہ ہے؟
اسرائیلی فوج نے جمعرات کے روز لبنان میں لوگوں کو انتباہ کیا ہے کہ وہ جنوبی لبنان کے ایک شہر اور دیگر ایسی کمیونٹیز کو خالی کر دیں جو اقوام متحدہ کے اعلان کردہ بفر زون کے شمال میں ہیں۔
یہ اس بات کا اشارہ ہوسکتا ہے کہ وہ عسکریت پسند گروپ حزب اللہ کے خلاف اس ہفتے کے آغاز میں شروع کی گئی زمینی کارروائی کو وسیع کر سکتا ہے۔
اسرائیل نے لوگوں سے کہا ہے کہ وہ صوبائی دار الحکومت نباتیح اور دریائے لیطانی کے شمال میں واقع دیگر کمیونٹیز سے نکل جائیں۔
یہ وہ علاقہ ہے جو اقوام متحدہ کی جانب سے قائم کردہ سرحدی زون کا شمالی کنارہ ہے۔ سلامتی کونسل نے 2006 کی جنگ کے بعد ایک قرارداد میں، دونوں فریقوں کی جانب سے ایک دوسرے پر خلاف ورزی کے الزامات کے بعد یہ زون قائم کیا تھا۔
مشرقِ وسطیٰ میں کشیدگی سے عالمی معیشت متاثر ہوسکتی ہے: آئی ایم ایف
عالمی مالیاتی ادارے آئی ایم ایف نے کہا ہے کہ مشرقِ وسطیٰ میں بڑھتی ہوئی کشیدگی کے علاقائی اور عالمی معیشت پر غیر معمولی اثرات مرتب ہوسکتے ہیں۔
ترجمان جولی کوزیک نے معمول کی پریس کانفرنس میں کہا کہ آئی ایم ایف جنوبی لبنان کی صورتِ حال پر ’گہری تشویش‘ کے ساتھ نظر رکھے ہوئے ہے اور جانی نقصان پر اظہارِ ہمدردی کرتا ہے۔
انہوں نے کہا کہ اگر کشیدگی مزید بڑھی تو اس سے پیدا ہونے والی بے یقینی اور خطرات کے معاشی اثرات خطے اور دنیا پر ہوں گے۔
حزب اللہ کا خلیجِ حیفا میں اسرائیلی فوج کے اڈے پر راکٹ حملوں کا دعویٰ
لبنان کی عسکری تنظیم حزب اللہ نے دعویٰ کیا ہے کہ اس نے خلیجِ حیفا میں اسرائیل کے فوجی اڈے پر راکٹ حملے کیے ہیں۔
تنظیم نے اپنے بیان میں کہا ہے کہ اس نے خلیجِ حفیا میں سخنین بیس پر حملہ کیا ہے جو اسرائیل کی ملٹری انڈسٹریز کے لیے استعمال ہوتی ہے۔