غزہ میں اسرائیلی حملے میں عورتوں اور بچوں سمیت 100 فلسطینی ہلاک

ایران کے رہبرِ اعلیٰ علی خامنہ ای نے کہا ہے کہ ایرانی حکام کو طے کرنا چاہیے کہ وہ اسرائیل کے سامنے اپنی قوت کا مظاہرہ کس طرح کریں گے۔

ایران کی سرکاری خبر رساں ایجنسی ارنا کے مطابق خامنہ ای نے کہا کہ دو راتیں قبل اسرائیل نے جو کارروائیاں کی ہیں انہیں نہ ہی کم کرکے بیان کرنا چاہیے اور نہ ہی ان میں مبالغہ کیا جائے۔

علی خامنہ ای کے بیان میں فوری کسی کارروائی کی بات نہیں کی گئی ہے۔ تاہم انہوں نے ایرانی حکام کو کہا ہے کہ اسرائیل کو ایران کی طاقت دکھانی چاہیے لیکن اس کا فیصلہ حکام عوامی اور قومی مفاد کو مدِ نظر رکھتے ہوئے کریں۔

اسرائیل نے جنوبی لبنان میں مزید 14 دیہات خالی کرنھ کی وارننگ جاری کردی ہے۔

اس وارننگ میں کہا گیا ہے کہ دیہات کے رہائشی اوالی دریا کے شمال کی جانب منتقل ہوجائیں۔

لبنان کے جنوب میں زوات الشکریہ کے علاقے میں اسرائیل کے فضائی حملے سے کم از کم تین افراد ہلاک ہوگئے ہیں۔

اسرائیل کے وزیر دفاع کا کہنا ہے کہ حماس اور حزب اللہ، ایران کے لیے اب مؤثر پراکسی نہیں رہیں۔

وزیر دفاع یوو گیلینٹ کا اتوار کو کہنا تھا کہ ایران، غزہ پٹی میں حماس کو اور لبنان میں حزب اللہ کو اسرائیل کے خلاف مؤثر طریقے سے استعمال نہیں کر سکتا۔

گیلینٹ کا مزید کہنا تھا کہ غزہ میں حماس اب مزید عسکری نیٹ ورک کے طور پر سرگرم نہیں ہے جبکہ ان کے بقول حزب اللہ کی سینئر قیادت اور اس کی میزائل کی صلاحیت کو ختم کر دیا گیا ہے۔

ان کے بقول دونوں عسکریت پسند گروپ ایران کے لیے مزید کار آمد نہیں ہو سکتے۔

اسرائیل کے وزیرِ اعظم بنیامین نیتن یاہو نے کہا ہے کہ ایران دفاعی اور میزائل بنانے کی صلاحیت کو بری طرح نقصان پہنچایا ہے۔

انہوں نے ہفتے کو ایران پر اسرائیلی حملوں کے بارے میں کہا ہے کہ اسرائیل نے ایران پر ’نپے تلے اور طاقت ور‘ حملے سے اپنے اہداف حاصل کر لیے ہیں۔

اپنے خطاب میں نیتن یاہو کا کہنا تھا کہ فضائی حملے میں ایران کے دفاع اور میزائل بنانے کی صلاحیت کو شدید نقصان پہنچایا ہے۔