براہِ راست ایس سی او اجلاس ختم؛ سیاسی اختلافات سے بالاتر ہو کر مشترکہ چیلنجز کو حل کرنے پر زور

آئینی ترمیم کے معاملے پر مشاورت کے لیے مولانا فضل الرحمان جاتی عمرہ پہنچ گئے ہیں۔ جے یو آئی (ف) کے وفد میں اسعد محمود، مرتضی کامران ایڈووکیٹ، اسلم غوری اور دیگر رہنما شامل ہیں۔

سابق صدر آصف زرداری اور بلاول بھٹو زرداری بھی کچھ دیر میں جاتی عمرہ پہنچیں گے جہاں وہ سابق وزیرِ اعظم نواز شریف کی جانب سے دیے گئے عشائیے میں شریک ہوں گے۔

ذرائع کے مطابق ملاقات میں مسلم لیگ (ن) سے دونوں پارٹیوں کے مسودے پر مشاورت ہو گی۔ امکان ہے کہ تینوں جماعتوں کا مشترکہ مسودے پر اتفاق ہو جائے گا۔

برطانیہ کی مشہور اوکسفرڈ یونی ورسٹی کے وائس چانسلر کا انتخاب لڑنے کے خواہش مند عمران خان اُمیدواروں کی دوڑ سے باہر ہو گئے ہیں۔

بدھ کو اوکسفرڈ یونی ورسٹی کی جانب سے 38 اُمیدواروں کی فہرست جاری کی گئی ہے جس میں عمران خان کا نام نہیں ہے۔

عمران خان ایک برس سے زائد عرصے سے راولپنڈی کی اڈیالہ جیل میں قید ہیں اور انہوں نے جیل سے ہی یہ الیکشن لڑنے کا فیصلہ کیا تھا۔ اس حوالے سے عمران خان کے قریبی ساتھی ذلفی بخاری برطانیہ میں بھرپور لابنگ کر رہے تھے۔

واضح رہے کہ سابق وزیرِ اعظم عمران خان نے 1975 میں اوکسفرڈ یونی ورسٹی سے گریجویشن کی تھی۔ فلسفہ، سیاست اور معیشت عمران خان کے مضامین میں شامل تھے۔

شنگھائی تعاون تنظیم کے سربراہان مملکت کی کونسل کا اجلاس اسلام آباد میں ختم ہو گیا ہے جس کے بعد رُکن ممالک کے وزرائے اعظم اور دیگر حکام وطن واپس روانہ ہو گئے ہیں۔

چین کے وزیرِ اعظم لی چیانگ، ازبکستان، تاجکستان، بیلاروس اور قازقستان کے وزرائے اعظم بھی واپس روانہ ہو گئے ہیں۔ بھارتی وزیر خارجہ جے شنکر بھی اسلام آباد سے نئی دہلی روانہ ہو گئے ہیں۔