پی ٹی آئی کا احتجاج: اسلام آباد اور لاہور میں پولیس کی پکڑ دھکڑ

اسلام آباد کے پی ہاؤس میں موجود وزیرِ اعلیٰ خیبر پختونخوا علی امین گنڈا پور اکو حراست میں لیے جانے کا امکان ہے۔

کے پی ہاؤس سے وائس آف امریکہ کے نمائندے عاصم علی رانا کے مطابق پولیس اور رینجرز کی بھاری نفری کے پی ہاؤس میں موجود ہے اور اہلکاروں نے داخلی راستے کا کنٹرول سنبھال لیا ہے۔

چیئرمین تحریکِ انصاف بیرسٹر گوہر بھی کے پی ہاؤس پہنچ گئے ہیں۔

کے پی ہاؤس میں اسلام آباد پولیس اور رینجرز کی موجودگی کو دیکھتے ہوئے وزیرِ اعلیٰ علی امین گنڈا پور کو حراست میں لیے جانے کا امکان ہے۔ تاہم وزیرِ اعلیٰ کے پی کے مشیر بیرسٹر سیف نے ایک بیان میں کہا ہے کہ علی امین گنڈاپور عدالت سے ضمانت پر ہیں، اگر انہیں گرفتار کیا گیا تو یہ توہینِ عدالت ہو گی۔

پاکستان تحریکِ انصاف (پی ٹی آئی) کے چیئرمین بیرسٹر گوہر خیبر پختونخوا (کے پی) ہاؤس سے روانہ ہوگئے ہیں۔ پولیس نے کئی پی ٹی آئی کارکنان کو بھی گرفتار کر لیا ہے۔

کے پی ہاؤس سے روانگنی کے موقع پر میڈیا نمائندگان کی جانب سے بیرسٹر گوہر سے بات کرنے کی کوشش کے باوجود انہوں نے بات نہیں کی۔

خیبر پختونخوا ہاؤس سے قیدیوں کی گاڑیاں بھی روانہ ہوگئی ہیں۔ پریژن وین میں پی ٹی آئی کے کارکنان موجود تھے۔