براہِ راست ایران اسرائیل پر بڑے بیلسٹک میزائل حملے کی تیاری کر رہا ہے: امریکہ کا دعویٰ

یروشلم میں امریکی سفارت خانے نے کشیدہ صورتِ حال کے پیشِ نظر اپنے شہریوں کے لیے سیکیورٹی الرٹ جاری کر دیا ہے۔

اسرائیل میں موجود امریکی شہریوِں، سرکاری اہلکاروں اور اُن کے اہلِ خانہ کو تاحکمِ ثانی محفوظ مقامات میں رہنے کی ہدایت کی گئی ہے۔

اسرائیل کی فوج کے ترجمان نے دعویٰ کیا ہے کہ حزب اللہ اسرائیل کے خلاف گزشتہ برس سات اکتوبر جیسے حملے کی تیاری کر رہی تھی۔

ترجمان ڈینئل ہگاری نے میڈیا کو اسرائیل کی لبنان میں فوجی جاری کارروائیوں کی فوٹیجز بھی جاری کی ہے۔

ہگاری کا کہنا تھا کہ آپریشنز کے دوران برآمد ہونے والے ہتھیاروں، نقشوں سے سے معلوم ہوا ہے کہ حزب اللہ ’جلیلی کی فتح‘ کے نام سے سات اکتوبر جیسے ایک حملے کی تیاری کر رہی تھی۔

انہوں نے بتایا کہ مختلف کارروائیوں میں حزب اللہ کے 700 مقامات کو تباہ کیا گیا ہے جن میں پہاڑوں میں بنائی گئی سرنگیں بھی شامل تھیں۔

اسرائیلی فوج کے ترجمان کا یہ بھی کہنا تھا، ’’ہم بیروت نہیں جائیں گے اور نہ ہی جنوبی لبنان کے شہروں میں جائیں گے۔ ہم اپنی سرحد کے قریب دیہات پر فوکس کر رہے ہیں۔‘‘

امریکہ نے خبردار کیا ہے کہ ایران اسرائیل کے خلاف بیلسٹک میزائل حملے کی بڑے پیمانے پر تیاری کر رہا ہے جس کے ’سنگین نتائج‘ ہوں گے۔

ایک سینئر عہدے دار نے نام ظاہر نہ کرنے کی شرط پر بتایا ہے کہ امریکہ دفاعی تیاریوں میں اسرائیل کی مدد کر رہا ہے۔

اسرائیل کی فوج کے ترجمان نے کہا ہے کہ انہیں ابھی تک ایران سے کسی براہ راست فضائی خطرے کی نشان دہی نہیں ہوئی ہے۔ تاہم اسرائیل کا فضائی دفاعی نظام پوری طرح تیار ہے۔

انہوں نے کہا ہے کہ اسرائیل پر ایران کے کسی بھی حملے کے نتائج اسے بھگتنا ہوں گے

روس نے اسرائیل پر زور دیا ہے کہ وہ جنوبی لبنان سے فوری طور پر اپنی فوج واپس بلا لے۔

منگل کو روس کی وزارتِ خارجہ کی جانب سے جاری کیے گئے بیان میں کہا گیا ہے کہ روس جنوبی لبنان میں اسرائیلی حملے کی مذمت کرتا ہے۔

بیان میں کہا گیا ہے کہ اسرائیل اپنی کارروائیاں روک کر مشرقِ وسطیٰ میں تنازع کے پرامن حل کی طرف توجہ دے۔

روسی وزارتِ خارجہ کے مطابق مسلح جارحیت کا سامنا کرنے والے لبنانی عوام کے ساتھ اظہارِ یکجہتی کرتے ہیں۔

سن 2022 میں یوکرین پر حملہ کرنے والے روس کے حزب اللہ کی پشت پناہی کرنے والے ایران کے ساتھ قریبی تعلقات ہیں اور وہ خطے میں بڑے پیمانے پر جنگ کا خدشہ ظاہر کرتا رہا ہے۔