شام: باغی گروپ کے محمد بشیر شام کے عبوری وزیراعظم مقرر

روس نے شام کے معزول صدر بشار الاسد کو سیاسی پناہ دینے کی تصدیق کردی ہے۔

روس کے حکومتی مرکز کریملن کے ترجمان دمتری پیسکوو نے صحافیوں کو بتایا ہےکہ صدر ولادیمیر پوٹن نے ذاتی طور پر بشار الاسد کو پناہ دینے کی پیش کش کی تھی۔

انہوں نے کہا کہ ایسے فیصلے سربراہِ مملکت ہی کرسکتے ہیں اس لیے پناہ دینے کا فیصلہ صدر پوٹن کا ہے۔

ترجمان نے بتایا ہے کہ صدر پوٹن نے روس پہنچنے کے بعد بشار الاسد سے ملاقات نہیں کی ہے۔

کریملن نے روس میں معزول شامی صدر کے قیام وغیرہ کی تفصیلات سے متعلق پوچھے گئے سوالو ں پر تبصرہ نہیں کیا ہے۔

دمتری پیسکوو نے کہا کہ ماسکو شام میں اپنے اڈوں کی حفاظت کے لیے ہر ممکن اقدامات کرے گا اور نئی آنے والے انتظام سے بات چیت کے بعد ہی ان اڈوں کے مستقبل کا فیصلہ کیا جائے گا۔

پاکستان کے وزیرِ اعظم شہباز شریف نے کہا ہے کہ شام میں مقیم پاکستانیوں کے محفوظ انخلا کے لیے تمام وسائل کو بروئے کار لایا جائیں گے۔

وزیراعظم کی زیر صدارت شام کی موجودہ صورت حال میں وہاں سے پاکستانیوں کے انخلاء سے متعلق اجلاس منعقد ہوا ہے۔

اجلاس میں وزیراعظم نے دمشق میں پاکستانی سفارت خانے کو معلومات کے حصول کے لیے ڈیسک اور پاکستانیوں سے رابطے کے لیے ہیلپ لائن قائم کرنے کی ہدایت کی ہے۔

وزیراعظم نے ہدایت کی ہے کہ شام سے وطن واپسی کے خواہاں پاکستانیوں کے ہمسایہ ممالک کے ذریعے جلد از جلد انخلاء کی حکمتِ عملی بنائی جائے۔

لبنان کی عسکری تنظیم حزب اللہ نے شام کی صورتِ حال کو ’’بڑی، خطرناک اور نئی تبدیلی‘‘ قرار دیا ہے۔

حزب اللہ کے رہنما اور لبنانی رکنِ پارلیمنٹ حسن فضل اللہ نے کہا ہے کہ شام میں جو کچھ ہوا اس پر کئی سوال ہیں جن کا جواب گہرے تجزیے کے بعد ہی ممکن ہے۔

شام میں بشار الاسد حکومت ختم ہونے کے بعد یہ حزب اللہ کے کسی رہنما کی جانب سے آنے والا پہلا رد عمل ہے۔

بشار الاسد حکومت ختم ہونے کے بعد پسپا ہونے والی شامی فوج کے ہزاروں اہل کار پڑوسی ملک عراق چلے گئے ہیں۔

عراق میں ایک ملیشیا کے عہدے دار نے پیر کو بتایا ہے کہ چار ہزار سے زائد شامی فوجی شام کی سرحد عبور کرکے عراق میں داخل ہوئے ہیں۔

عراق میں انبار ٹرائبل موبلائزیشن فورسز کے ایک عہدے دار نے بتایا ہے کہ شامی فوجیوں نے اسلحہ، گاڑیاں اور دیگر ساز و سامان حوالے کردیا ہے اور انہیں ایک کیمپ میں ٹھہرایا جائے گا۔

عہدے دار نے اس کیمپ کے محلِ وقوع کے بارے میں تفصیلات فراہم نہیں کی ہیں۔

ایک اور عسکری عہدے دار نے بتایا ہے کہ شامی صوبے حسکہ کے گورنر بھی اتوار کی شب اپنے سیکیورٹی قافلے کے ساتھ قائم نامی سرحدی کراسنگ سے عراق میں داخل ہوئے ہیں۔