اسرائیل پر جنگ بندی کے لیے ’دباؤ‘ کم نہیں ہونے دیں گے: امریکہ

اسرائیل کے وزیرِ دفاع یوو گیلنٹ نے کہا ہے کہ ایران نے اسرائیل کو نقصان پہنچانے کی کوشش کی تو اس کا حال بھی غزہ جیسا ہوگا۔

انہوں ںے حالیہ حملے سے متعلق بیان میں کہا ہے کہ ایران ہماری فضائیہ کو چھونے میں بھی ناکام رہا ہے اور ہمارے کسی طیارے کو نقصان نہیں پہنچا ہے۔

ان کا کہنا تھا کہ جو بھی سمجھتا ہے کہ ہمیں نقصان پہنچا کر ہمیں کارروائی سے روک سکتا ہے وہ غزہ اور بیروت کو دیکھ لے۔

لبنان کی وزارتِ تعلیم نے کہا ہے کہ سیکیورٹی خطرات کے باعث اسکولوں میں تعلیمی سال شروع نہیں ہوپائے گا۔

وزیرِ تعلیم کا کہنا ہے کہ موجودہ حالات کی وجہ سے لبنان میں نیا تعلیمی سال چار نومبر تک مؤخر کیا جارہا ہے۔

جرمنی کے چانسلر اولاف شولز نے غزہ جنگ کو ایک سال مکمل ہونے پر جنگ بندی کا مطالبہ کیا ہے۔

انہوں نے اپنے بیان میں دنیا میں بڑھتی ہوئی یہود مخالفت پر بھی تشویش کا اظہار کیا۔

ان کا کہنا تھا کہ بدقسمتی سے حماس کے اسرائیل پر دہشت گرد حملے سے مشرقِ وسطیٰ میں مفاہمت کے امکانات انتہائی کم ہوگئے ہیں۔

جرمن چانسلر نے کہا کہ غزہ کی پٹی میں شہری آبادی کے تحفظ اور اسرائیل یرغمالوں کی واپسی کے لیے جنگ بندی بہت ضروری ہے۔

اسرائیلی فوج نے جنوبی لبنان میں مزید علاقے خالی کرنے کی نئی وارننگ جاری کر دی ہے۔

فوج کے ترجمان کے تازہ بیان میں جنوبی لبنان کے 25 علاقوں کے رہائشیوں کا خبردار کیا گیا ہے کہ وہ فوری طور پر شمال کی جانب منتقل ہوجائیں۔