حزب اللہ کے متوقع سربراہ بھی شاید مارے گئے ہیں: اسرائیل کا دعویٰ

اسرائیل کی فوج نے کہا ہے کہ لبنان کے جنوبی ساحل پر جلد ہی آپریشن کا آغاز کیا جا رہا ہے۔

بیان میں متنبہ کیا گیا ہے کہ لبنان کے شہری ساحلی علاقے اور سمندر سے دور رہیں۔

پیر کو جاری بیان میں مزید کہا گیا ہے کہ لبنان کے ماہی گیر اور سمندری حدود استعمال کرنے والے دیگر افراد شمالی اسرائیل کے ساتھ سرحدی علاقے اور سمندر میں 40 کلومیٹر کی دوری پر رہیں۔

بیان میں کہا گیا ہے کہ وہ لوگ جو سمندر میں جائیں گے اور کشتیاں استعمال کریں گے وہ اپنی زندگیوں کو خطرے میں ڈالیں گے۔

فرانس کے دارالحکومت پیرس میں فرانسیسی صدر ایمانوئل میکرون نے غزہ میں یرغمال فرانس کے کی شہریت رکھنے والے افراد کے اہلِ خانہ سے ملاقات کی۔

حماس نے سات اکتوبر 2023 کو اسرائیل پر حملوں کے دوران ڈھائی سو افراد کو یرغمال بنایا تھا جن میں سے سو سے زائد کو رہا کیا جا چکا ہے جب کہ متعدد کی اموات ہو چکی ہیں۔ اسرائیلی حکام کے مطابق حماس کی تحویل میں ساٹھ سے زائد یرغمالی موجود ہیں۔

حماس کی تحویل میں موجود یرغمالوں میں فرانس کی شہریت رکھنے والے دو افراد بھی شامل ہیں۔ ان دونوں افراد کے اہلِ خانہ سے صدر ایمانوئل میکرون نے ملاقات میں یقین دہانی کرائی کہ فرانس کی حکومت غزہ میں جنگ بندی اور یرغمالوں کی بازیابی کے لیے ہر ممکن اقدام کرے گی۔

برازیل کی حکومت لبنان سے اپنے شہریوں کے انخلا کے لیے خصوصی پروازیں چلا رہی ہے۔

برازیلی فضائیہ کے جاری کردہ بیان کے مطابق لبنان سے دوسرا طیارہ شہریوں کو لے کر برازیل پہنچ گیا ہے۔

بیان کے مطابق برازیل کی ایئرفورس کے اس طیارے میں 49 بچوں سمیت 227 شہری سوار تھے۔

واضح رہے کہ لبنان میں برازیل کے لگ بھگ 21 ہزار شہری موجود ہیں۔

اسرائیل پر حماس کے حملوں کو ایک برس مکمل ہونے پر وائٹ ہاؤس میں یادگاری تقریب منقعد کی گئی۔

وائٹ ہاؤس میں ہونے والی تقریب میں امریکہ کے صدر جو بائیڈن اور ان کی اہلیہ جل بائیڈن نے شرکت کی۔

اس تقریب سے قبل جو بائیڈن نے اسرائیل کے صدر آئزک ہرزوگ سے بھی ٹیلی فون پر گفتگو کی تھی۔

تقریب کے دوران امریکی صدر نے ایک چھوٹی میز پر رکھی واحد موم بتی روشن کی اور کچھ وقت کے لیے خاموشی اختیار کی۔