اسرائیل کا اقوامِ متحدہ سے لبنان کے جنگ زدہ علاقوں سے امن فورس نکالنے کا مطالبہ

امریکی حکام کے مطابق اسرائیل نے ایران کے حالیہ میزائل حملوں کا جواب دینے کے لیے اپنے اہداف کا تعین کرلیا ہے۔

امریکہ کے خبر رساں ادارے این بی سی کی ایک رپورٹ میں شناخت ظاہر کیے بغیر امریکی حکام کے حوالے سے بتایا گیا ہے کہ اس بات کی نشاندہی نہیں کی گئی ہے کہ اسرائیل ایران کی جوہری تنصیبات کو نشانہ بنائے گا یا کسی اہم شخصیت کو قتل کرے گا۔

رپورٹ کے مطابق اسرائیل نے تاحال جوابی کارروائی کے وقت کا حتمی فیصلہ نہیں کیا ہے۔ تاہم اسرائیلی اور امریکی حکام کا کہنا ہے کہہ ممکنہ کارروائی یہودیوں کے مقدس تہوار یومِ کپور کی تعطیلات کے دوران ہوسکتی ہے۔

اسرائیل کی جانب سے لبنان کے مزید علاقے خالی کرانے کی وراننگ کے بعد سے اس کی کارروائیوں میں مزید شدت آگئی ہے۔

لبنانی عسکریت پسند تنظیم حزب اللہ نے کہا ہے کہ جنوبی لبنان کے رامیہ گاؤں میں اسرائیلی فوج کو داخل ہونے سے روکنے کے لیے اس کا مقابلہ کر رہے ہیں۔

ہفتے کو غزہ کے مقامی طبی حکام کے مطابق اسرائیل کے حملوں میں 29 فلسطینی ہلاک ہوگئے ہیں۔

ان کے مطابق اسرائیل نے جبالیہ کے علاقے میں حملے بڑھا دیے ہیں جس کے بعد امدادی تنظیموں کے مطابق ہزاروں شہری ان علاقوں میں پھنس گئے ہیں۔

لبنان میں تعینات اقوام متحدہ کی امن فورس میں شامل 40 ممالک نے فورس پر اسرائیل کے حملوں کی مذمت کی ہے۔

ان ممالک کے مشترکہ بیان میں مطالبہ کیا گیا ہے کہ امن مشن پر حملے فوری طور پر روکے جائیں۔

مشترکہ بیان جاری کرنے والے ممالک میں پولینڈ، انڈونیشیا، اٹلی اور بھارت بھی شامل ہیں۔

جنوبی لبنان میں حزب اللہ کے خلاف اسرائیل کے حملوں میں اقوام متحدہ کی امن فورس کی تنصیبات بھی زد میں آئی ہیں۔گزشتہ 48 گھنٹوں کے درمیان امن فورس پر ہونے والے حملون میں اب تک اس کے کم از کم پانچ اہل کار زخمی ہوچکے ہیں۔

جنوبی لبنان میں اسرائیل کے حملے سے اقوام متحدہ کی امن فوج کی اہم ترین بیس بری طرح متاثر ہوئی ہے جس پر اقوامِ متحدہ کے سیکریٹری جنرل نے مغربی ممالک سے اس حملے کی مذمت کا مطالبہ کیا ہے۔

لبنان کے سرکاری میڈٰیا نے کہا کہ اتوار کو اسرائیل کے ایک حملے میں ایک مسجد مکمل طور پر تباہ ہوگئی ہے۔

لبنان کے سرکاری میڈیا کا کہنا ہے کہ اسرائیل نے صبح سویرے جنوبی لبنان مین کفر تبنت کو ہدف بنایا ہے۔

گاؤں کے میئر کے مطابق یہ مسجد تقریباً 100 برس پرانی تھی۔