شمالی لبنان میں اپارٹمنٹ بلڈنگ پر اسرائیلی فضائی حملے میں 21 افراد ہلاک ہو گئے

امریکہ کے محکمۂ دفاع پینٹاگان نے کہا ہے کہ امریکی وزیرِ دفاع لائیڈ آسٹن نے اسرائیلی ہم منصب سے ٹیلی فون پر رابطہ کرکے زور دیا کہ لبنان میں موجود اقوامِ متحدہ کی امن فورسز اور لبنان کی فوج کی حفاظت کو یقینی بنانے کے لیے مؤثر اقدامات کیے جائیں۔

لائیڈ آسٹن نے اسرائیل کے وزیرِ دفاع یوو گلینٹ سے ٹیلی فون پر اس بات پر بھی زور دیا کہ لبنان میں جس قدر جلد ممکن ہو فوجی کارروائی سے سفارتی اقدامات کی جانب بڑھا جائے۔

انہوں نے غزہ میں انسانی بنیادوں پر اقدامات پر بھی زور دیا۔

اسرائیل کی فوج غزہ کے شمالی علاقوں میں اپنی فوجی کارروائی کو مزید وسعت دے رہی ہے۔

غزہ سٹی میں اس کے ٹینک شمالی سرحدی علاقوں تک پہنچ گئے ہیں۔

غزہ سٹی کی شمالی سرحد پر شیخ رضوان کے علاقے اور اس کے قریبی آبادیوں کے مکینوں کا کہنا ہے کہ ان کو نقل مکانی پر مجبور کیا جا رہا ہے۔

مقامی فلسطینیوں کا کہنا ہے کہ اسرائیل کی فوج نے بیت الحنون، جبالیہ اور بیت الاہیہ کا رابطہ دیگر علاقوں سے منقطع کر دیا ہے۔

ان کے بقول ان علاقوں سے کسی کو دوسری جانب منتقل ہونے کی اجازت نہیں ہے۔ صرف ان خاندانوں کو جانے کی اجازت دی جا رہی ہے جو یہاں سے انخلا کرنا چاہتے ہیں۔

امریکہ نے اعلان کیا ہے کہ وہ اپنے فوجی اہلکار اور ایڈوانس اینٹی میزائل سسٹم اسرائیل بھیجے گا۔

امریکہ کی جانب سے یہ اعلان اتوار کو سامنے آیا ہے۔ امریکہ کے مطابق اس انتہائی غیر معمولی تعیناتی کا مقصد ایران کے اسرائیل پر میزائل حملوں کے بعد اس کے فضائی دفاع کو مضبوط کرنا ہے۔

امریکی صدر جو بائیڈن نے کہا ہے کہ اس اقدام کا مقصد اسرائیل کا دفاع کرنا ہے۔

واضح رہے کہ دو ہفتے قبل ایران نے اسرائیل پر لگ بھگ 180 میزائل داغے تھے جن میں سے بیشتر کواسرائیلی دفاعی نظام نے تباہ کر دیا تھا جب کہ بعض میزائل زمین پر بھی گرے تھے۔

اب امکان ظاہر کیا جا رہا ہے کہ اسرائیل ایران کے حملوں کا جواب دے گا اور ایرانی تنصیابات کو نشانہ بنائے گا۔

مشرقِ وسطیٰ میں کشیدگی کے دوران گزشتہ روز پیش آنے والے واقعات سے متعلق پڑھنے کے لیے یہاں کلک کریں۔