شمالی لبنان میں اپارٹمنٹ بلڈنگ پر اسرائیلی فضائی حملے میں 21 افراد ہلاک ہو گئے

شمالی لبنان میں اپارٹمنٹ بلڈنگ پر اسرائیلی فضائی حملے میں21 افراد ہلاک ہو گئے

صحت کے حکام نے کہا ہے کہ اسرائیل نے لبنان میں حزب اللہ کے عسکریت پسندوں کے ساتھ اپنی جنگ میں اپنے اہداف کو توسیع دیتے ہوئے شمال میں ایک فضائی حملے میں کم از کم 21 لوگوں کو ہلاک کر دیا ، جب کہ لاکھو ں اسرائیلیوں نے سرحد پار سے فائر کئے جانے والے پراجیکٹائلز سے بچنے کے لیے پناہ گاہوں کا رخ کیا ۔

اب تک لبنان میں اسرائیلی فوجی کارروائی جنوب ، مشرق میں بیکا وادی اور بیروت کے مضافات پر مرکوز رہی ہے۔

کرسچین اکثریتی قصبے ایتو پر یہ حملہ کے ایک گھر پر کیا گیا جسے بے گھر خاندانوں نے کرائے پر لیا ہوا تھا۔ یہ بات قصبے کے مئیر جوزف ٹراڈ نے رائٹرز کو بتائی۔ لبنان کی وزارت صحت نے بتایا کہ ان ہلاکتوں کے علاوہ آٹھ لوگ زخمی بھی ہوئے ۔

اسرائیلی فوج کی جانب سے فوری طور پر کوئی تبصرہ نہیں کیا گیا اور یہ واضح نہیں ہو سکا کہ ہدف کیا تھا۔

اسرائیل کے وسطی علاقے پر ہونے والے دو ڈرون حملوں میں چار اسرائیلی فوجی ہلاک جب کہ 67 افراد زخمی ہوئے ہیں۔

لبنان کی عسکری تنظیم حزب اللہ نے دعویٰ کیا ہے کہ اس نے اسرائیلی فوج کے گولانی بریگیڈ کے کیمپ کو نشانہ بنایا ہے۔

اسرائیلی طبی حکام کے مطابق زخمیوں میں کئی افراد کی حالت تشویش ناک ہے۔

بعض رپورٹس میں اس حملے کو سات اکتوبر 2023 کے بعد سے اسرائیل کو سب سے زیادہ نقصان پہنچانے والا قرار دیا جا رہا ہے۔

غزہ کے الاقصیٰ اسپتال کے باہر پیر کی صبح اسرائیلی فوج نے بے گھر فلسطینیوں کے خیموں پر حملہ کیا ہے جس کے نتیجے میں تین افراد ہلاک جب کہ 50 سے زائد زخمی ہوئے ہیں۔

فوج کے مطابق اس نے حماس کے کمانڈ سینٹر کو نشانہ بنایا ہے۔ حماس تردید کر چکی ہے کہ وہ عام شہریوں کے لیے مخصوص مقامات کو کارروائیوں کے لیے استعمال نہیں کرتی۔

اسرائیل حماس جنگ کا آغاز حماس کے سات اکتوبر دو ہزار تئیس کو جنوبی اسرائیل پر غیر متوقع دہشت گرد حملے کے بعد ہوا تھا۔ اسرائیلی حکام کے مطابق حملے میں بارہ سو افراد ہلاک ہوئے تھے جب کہ حماس کے زیرِ انتظام غزہ کے محکمۂ صحت کے مطابق جنگ میں تقریباً بیالیس ہزار فلسطینی ہلاک ہو چکے ہیں۔