شمالی لبنان میں اپارٹمنٹ بلڈنگ پر اسرائیلی فضائی حملے میں 21 افراد ہلاک ہو گئے

غزہ میں سول ڈیفنس حکام کا کہنا ہے کہ اسرائیل کے اتوار کو الشطی مہاجرین کیمپ پر کیے گئے ڈرون حملے میں پانچ بچے ہلاک ہوئے ہیں۔

غزہ کے محکمۂ سول ڈیفنس کے ایک ترجمان نے ’اے ایف پی‘ کو بتایا کہ رضا کاروں کو پانچ بچوں کی لاشیں ملی ہیں۔ اسرائیل نے اس مقام پر ڈرون حملہ کیا تھا جہاں کھیل میں مصروف بچے نشانہ بنے تھے۔

انہوں نے مزید کہا کہ بچوں کی لاشیں الشفا اسپتال منتقل کر دی گئی ہیں۔

غزہ میں حماس کے زیرِ انتظام وزارتِ صحت کے اعداد و شمار کے مطابق گزشتہ برس اکتوبر کے بعد سے اسرائیلی حملوں میں لگ بھگ 42 ہزار افراد ہلاک ہو چکے ہیں جن میں اکثریت بچوں اور خواتین کی ہے۔

اسرائیل کے وسطی علاقوں پر دو ڈرون حملے کیے گئے ہیں جن میں متعدد افراد کے زخمی ہونے کی اطلاعات ہیں۔

لبنان کی عسکری تنظیم حزب اللہ نے کہا ہے کہ اس نے اسرائیل کے جنوبی شہر حیفا سے 30 کلو میٹر دور واقع بن یامینہ فوجی کیمپ پر ڈرون حملہ کیا ہے۔

اسرائیلی حکام نے حزب اللہ کے ڈورن حملے اور اس میں لوگوں کے نشانہ بننے کی تصدیق کی ہے۔

اسرائیل کی فوج نے تسلیم کیا ہے کہ حزب اللہ کے ڈرون حملے میں اس کے چار فوجی اہلکار ہلاک ہو گئے ہیں۔

حزب اللہ کے دو ڈرون طیارے بن یامینہ کے علاقے میں گرے ہیں۔

طبی حکام کا کہنا ہے کہ ان ڈرون حملوں میں 67 افراد زخمی ہوئے ہیں۔ ان زخمیوں میں کئی افراد کی حالت تشویش ناک ہے۔

اسرائیلی میڈیا پر چلنے والی ویڈیوز میں دیکھا جا سکتا ہے کہ زخمی فوجیوں کو ہیلی کاپٹرز اور ایمبولینسوں کے ذریعے اسپتال منتقل کیا جا رہا ہے۔

بعض زخمی فوجی وردیوں میں ہیں جب کہ سادہ لباس زخمیوں کے بارے میں واضح نہیں ہے کہ وہ عام شہری ہیں یا وہ بھی فوجی اہلکار ہیں۔

جنگ زدہ علاقے غزہ کے 27 طلبہ پاکستان پہنچ گئے ہیں۔ یہ فلسطینی طلبہ میڈیکل کے طالب علم ہیں جو اپنی ڈگری مکمل کرنے کے لیے مصر کے راستے پاکستان پہنچ پہنچے ہیں۔

لاہور پہنچنے پر غیر سرکاری تنظیم الخدمت فاؤنڈیشن نے طلبہ کے وفد کا خیر مقدم کیا۔

گزشتہ روز قاہرہ میں پاکستان کے سفارت خانے نے بتایا تھا یہ غزہ سے تعلق رکھنے والے یہ طلبہ لاہور پہنچ کر اپنی باقی تعلیم مکمل کریں گے۔

سفارت خانے کے مطابق یہ ان 192 فلسطینی طلبہ کا پہلا بیچ ہے جن کی تعلیم پاکستان میں مکمل کرانے کا اعلان کیا گیا تھا۔