اسرائیل کا حزب اللہ کے ایک اور کمانڈر کو ہلاک کرنے کا دعویٰ

ایرانی پاسداران انقلاب کے کمانڈر جنرل حسین سلامی نے اسرائیل کے حملے کی صورت میں ایک بار پھر ایران کی جانب سے میزائل حملوں کی دھمکی دی ہے۔

ستمبر میں حزب اللہ کے سربراہ حسن نصر اللہ کے ہمراہ لبنان کے دارالحکومت بیروت میں اسرائیلی حملے میں ہلاک ہونے والے پاسداران انقلاب کے کمانڈر عباس نیلفروشان کی نمازِ جنازہ کے موقع پر جمعرات کو جنرل حسین سلامی کا کہنا تھا کہ اسرائیل دوبارہ غلطی نہ کرے۔ ان کے بقول اگر اسرائیل نے ایران کو یا خطے میں اس کہیں بھی کو نشانہ بنایا تو ایران درد ناک انداز میں اسرائیل پر پھر حملہ کرے گا۔

انہوں نے مزید کہا کہ اسرائیل پر اکتوبر کے آغاز میں میزائل حسن نصر اللہ اور جنرل نیلفروشان کی ہلاکت کے جواب میں کیا گیا تھا۔

ان کا دعویٰ تھا کہ امریکہ کا اسرائیل بھیجا گیا دفاعی نظام بھی اس کو ایران کے حملوں سے محفوظ نہیں بنا سکے گا۔

انہوں نے اسرائیل کو دھمکی دیتے ہوئے کہا کہ ’’ہم تمھاری کمزوروں سے واقف ہیں اور یہ بات تمھارے علم میں بھی ہے۔‘‘

اسرائیل کے لبنان کے مختلف علاقوں پر فضائی حملے جاری ہیں۔ گزشتہ 24 گھنٹوں میں کیے گئے حملوں کے دوران 27 افراد ہلاک ہو چکے ہیں۔

لبنانی حکام کا کہنا ہے کہ اسرائیل کے حملوں میں زیادہ تر جنوبی علاقوں کو نشانہ بنایا گیا ہے جہاں گزشتہ روز سے اب تک ایک درجن سے زائد افراد مارے گئے ہیں۔ ان میں ایک شہر کی بلدیہ کا میئر بھی شامل ہے۔

لبنان کے وزیرِ اعظم نجیب میقاتی نے اسرائیل پر الزام لگایا ہے کہ اس نے بدھ کو قصداََ النبطیہ کی بلدیہ کی عمارت کو نشانہ بنایا ہے جہاں میئر کی صدارت میں امدادی امور سے متعلق اجلاس جاری تھی۔

بلدیہ کی اس عمارت پر حملے میں چھ افراد ہلاک ہوئے تھے۔

دوسری جانب اسرائیل کی جانب سے مسلسل دعویٰ کیا جا رہا ہے کہ وہ حزب اللہ کے جنگجوؤں کو نشانہ بنا رہا ہے۔

لبنان کی طاقت ور عسکری تنظیم حزب اللہ نے دعویٰ کیا ہے کہ اس نے لبنانی سرحد کے قریب اسرائیل کا ایک ٹینک تباہ کر دیا ہے۔

حزب اللہ کا کہنا ہے کہ اس نے اسرائیلی ٹینک کو گائیڈڈ میزائل سے نشانہ بنایا ہے۔

ایک روز قبل بھی حزب اللہ نے سرحدی علاقے میں اسرائیلی ٹینک تباہ کرنے کا دعویٰ کیا تھا۔

عسکری تنظیم کے ان دعوؤں پر اسرائیل کی فوج کی جانب سے کوئی بھی تبصرہ نہیں کیا گیا۔

غزہ میں طبی حکام نے جمعرات کو کہا ہے کہ اسرائیل کے غزہ پر بمباری میں مزید 11 فلسطینیوں کی موت ہوئی ہے۔

اسرائیل نے اپنی فوج کو ٹینک شمالی غزہ میں جبالیہ بھیج دیے ہیں۔ اس علاقے میں مقامی افراد کے ساتھ ساتھ اقوامِ متحدہ کی جانب خوراک کی کمی کے حوالے سے انتباہ جاری کیا جا چکا ہے۔

فلسطینیوں کا کہنا ہے کہ جبالیہ میں اسرائیل کے ٹینکوں نے گولہ باری سے کئی عمارتوں کو تباہ کر دیا ہے جب کہ متعدد عمارتوں میں بارودی مواد نصب کرکے ان میں دھماکے کیے گئے ہیں۔

امدادی رضا کاروں کا کہنا ہے کہ انہوں نے کئی زخمیوں کو جبالیہ میں ان اسکولوں سے منتقل کیا ہے جہاں بے گھر افراد کی پناہ گاہیں قائم تھیں۔ اسرائیلی ٹینکوں کی گولہ باری سے ان پناہ گاہوں میں آگ لگ گئی تھی۔

فلسطینیوں کا کہنا ہے کہ اسرائیل کی فوج نے بیت الحنون، جبالیہ اور بیت الہیہ کا رابطہ دیگر علاقوں سے مؤثر انداز سے منقطع کر دیا ہے۔ ان علاقوں میں کسی قسم کے سفر کی اجازت نہیں ہے۔ صرف ان خاندانوں کو یہ علاقے چھوڑنے کی اجازت دی جا رہی ہے جن کے پاس نقل مکانی کے اجازت نامے موجود ہیں۔