چار سال قبل نواز شریف کن حالات میں لندن گئے تھے؟
سابق وزیرِ اعظم نواز شریف چار سال بعد آج پاکستان واپس پہنچ رہے ہیں۔ چار سال قبل نواز شریف علاج کی غرض سے اس وقت لندن گئے تھے، جب پاکستان میں عمران خان کی حکومت تھی اور نواز شریف کو کئی کیسز کا سامنا تھا۔
اس دور میں نواز شریف کے علاوہ مسلم لیگ (ن) کے دیگر کئی رہنماؤں کے خلاف مختلف کیسز زیرِ سماعت تھے۔
نواز شریف کو 2018 میں العزیزیہ ملز اور ایون فیلڈ کرپشن کیسز میں سات سال قید کی سزا سنائی گئی تھی جو وہ لاہور کی کوٹ لکھپت جیل میں کاٹ رہے تھے۔
نواز شریف دسمبر 2018 سے نومبر 2019 کے دوران دل کی تکلیف کے باعث لاہور کے مختلف اسپتالوں میں بھی زیر علاج رہے۔ اس دوران ان کے وکلا کی جانب سے طبی بنیادوں پر اُن کی ضمانت پر رہائی کی بھی درخواست دائر کی گئی۔ بعد ازاں وہ نومبر میں ہی لندن روانہ ہوگئے۔
'نواز شریف ووٹ کو عزت دو کے بیانیے پر قائم ہیں'
پی ٹی آئی رہنما ڈاکٹر شہباز گل کی مسلم لیگ (ن) پر تنقید
پاکستان تحریکِ انصاف کے رہنما ڈاکٹر شہباز گل نے نواز شریف کی وطن واپسی پر مینارِ پاکستان میں جلسے پر تنقید کی ہے۔
سوشل میڈیا پلیٹ فارم 'ایکس' پر اپنی پوسٹ میں شہباز گل نے کہا کہ مسلم لیگ (ن) نے میڈیا کو جلسے کی کوریج کی اجازت نہیں دی، چینلز کو فوٹیج مسلم لیگ (ن) فراہم کرے گی جب کہ ڈرونز یا بلندی سے بھی کوریج کی اجازت نہیں ہے۔
نواز شریف کی واپسی: لاہور کے لوگ کیا کہتے ہیں؟