نواز شریف کا طیارہ اسلام آباد ایئرپورٹ پر لینڈ کر گیا
سابق وزیرِ اعظم نواز شریف چار برس بعد خود ساختہ جلا وطنی ختم کر کے پاکستان واپس پہنچ گئے ہیں۔
نواز شریف چارٹر طیارے کے ذریعے دبئی سے اسلام آباد پہنچے۔ نواز شریف کے ہمراہ مسلم لیگ (ن) کے رہنماؤں کے علاوہ صحافیوں کی بڑی تعداد بھی موجود ہے۔
نواز شریف چند روز قبل سعودی عرب سے دبئی پہنچے تھے۔ نواز شریف لندن سے سعودی عرب آئے تھے جہاں اُنہوں نے عمرہ کی ادائیگی کی تھی۔
سابق وزیرِ اعظم اسلام آباد کچھ دیر قیام کے بعد لاہور روانہ ہو جائیں گے، جہاں وہ مینارِ پاکستان میں جلسے سے خطاب کریں گے۔
نواز شریف کے طیارے کی اسلام آباد لینڈنگ، کب کیا ہوا؟
نواز شریف کا طیارہ لاہور پہنچ گیا
سابق وزیرِ اعظم نواز شریف کا طیارہ اسلام آباد سے لاہور پہنچ گیا ہے۔
اطلاعات ہیں کہ نواز شریف لاہور کے علامہ اقبال انٹرنیشنل ایئرپورٹ سے بذریعہ ہیلی کاپٹر مینارِ پاکستان جائیں گے جہاں وہ جلسے سے خطاب کریں گے۔
نواز شریف کی صاحبزادی مریم نواز سمیت پارٹی کے سینئر رہنما پہلے ہی جلسہ گاہ میں موجود ہیں جہاں کارکنوں کی آمد کا سلسلہ بھی جاری ہے۔ نواز شریف کی آمد کے بعد مسلم لیگ ن کے جلسے کا باقاعدہ آغاز ہو گا۔