پاڪستان جي قومي سلامتيءَ جي ڪاميٽيءَ چيو آهي ته ملڪ ۾ دهشت گرديءَ جي هلندڙ لهر بندش پيل تحريڪ طالبان پاڪستان (ٽي ٽي پي) جي لاءِ نرم رويو رکڻ ۽ سوچ ويچار جي گهٽتائيءَ تي مبني پاليسيءَ جو نتيجو آهي جيڪو عوامي توقعات ۽ خواهشن جي ابتڙ آهي.
قومي سلامتي ڪائونسل جو ايڪيتاليهون اجلاس جمعي ڏينهن وزير اعظم هائوس ۾ ٿيو. اجلاس جي صدارت وزير اعظم شهباز شريف ڪئي ۽ ان ۾ چيف آف آرمي اسٽاف جنرل عاصم منير، چيئرمين جوائنٽ چيفس آف اسٽاف ڪاميٽي جنرل ساحر شمشاد مرزا، هوائي ۽ سامونڊي فوج جي سربراهن ۽ بچاءَ، خزاني ۽ اطلاعات جي وفاقي وزيرن به شرڪت ڪئي.
اجلاس کان پوءِ جاري ٿيڻ واري اعلان جي مطابق قومي سلامتي ڪاميٽيءَ دهشت گرديءَ جي تازي لهر کي ٽي ٽي پيءَ سان نرميءَ جي برتاءَ کي روا رکڻ ۽ سوچ ويچار کان وانجهي پاليسيءَ جو نتيجو ٻڌايو ويو آهي.
اعلان ۾ چيو ويو آهي ته ٽي ٽي پي جي متعلق پاليسي عوامي توقعات ۽ خواهشن جي بالڪل ابتڙ آهي جنهن جي نتيجي ۾ دهشت گردن کي بنا ڪنهن رڪاوٽ جي واپس اچڻ جي نه صرف اجازت ڏني وئي بلڪه ٽي ٽي پيءَ جي خطرناڪ دهشت گردن کي اعتماد سازيءَ جي نالي ۾ جيلن مان آزاد ڪرڻ به آهي.
واضح رهي ته پاڪستان تحريڪ انصاف جي حڪومت جي دور ۾ بندش پيل تحريڪ طالبان پاڪستان سان مذاڪرات جو آغاز ڪيو ويو هو ۽ مذاڪرات جي لاءِ اعتماد سازيءَ جا قدم به کنئيا ويا هيا. انهن مذاڪرات ۾ اڳوڻو ڊي جي، ’آئي ايس آئي’ ۽ ڪور ڪمانڊر پشاور ليفٽيننٽ جنرل ريٽائرڊ فيض حميد اهم ڪردار ادا ڪيو هو.
پاڪستان تحريڪ انصاف ملڪ ۾ ۽ خصوصي طور تي خيبرپختونخوا ۾ امن قائم ڪرڻ جي لاءِ ٽي ٽي پيءَ سان مذاڪرات جو دفاع ڪندي رهي آهي.
دهشت گرديءَ جي خلاف آپريشن جي لاءَ ڪاميٽي
قومي سلامتي ڪاميٽيءَ جي اجلاس جو ايجنڊا جاري نه ڪيو ويو هو، پر توقع ظاهر ڪئي پئي وئي ته اجلاس ۾ ملڪ ۾ امن و امان، معاشي حالتن ۽ سپريم ڪورٽ جي فيصلي کان پوءِ پيدا ٿيندڙ صورت حال تي به ڳالهه ٻولهه ٿيندي.
البته اجلاس جي اعلان ۾ چونڊن يا ملڪ جي سياسي صورت حال جي متعلق براه راست ڪا ڳالهه نه ڪئي وئي، بلڪه سرڪاري بيان جي مطابق، دهشت گردي ۽ امن و امان جي صورت حال ئي هن اجلاس جو محور بڻيو رهيو.
قومي سلامتي ڪاميٽيءَ جي اجلاس ۾ دهشت گرديءَ جي مقابلي جي لاءِ جامع آپريشن شروع ڪرڻ جي منظوري ڏني وئي جنهن جي لاءِ اعليٰ سطح جي هڪ ڪاميٽي به ٺاهي وئي جيڪا ٻن هفتن ۾ پنهنجي سفارش پيش ڪندي.
اعلان جي مطابق اجلاس ۾ تازو عليحدگي پسند تنظيم، بلوچ نيشنل آرمي ۽ ’براس’ جي باني اڳواڻ گلزار امام عرف شمبي جي گرفتاريءَ تي انٽيلي جينس جي ادارن کي ساراهيو ويو.
بيان ۾ چيو ويو آهي ته قومي سلامتي ڪاميٽيءَ ’’وڌندڙ نفرت انگيزي، معاشري ۾ تقسيم ۽ لڪل هدف جي آڙ ۾ رياستي ادارن ۽ انهن جي قيادت جي خلاف غير ملڪن جي ’اسپانسرڊ’ زهريلي پروپيگنڊا سوشل ميڊيا تي ڦهلائڻ جي ڪوششن جي شديد مذمت ڪئي ۽ چيو ته ان جي ڪري قومي سلامتي متاثر ٿي آهي.
خيال رهي ته ان کان اڳ حڪومت پاڪستان تحريڪ انصاف جي قيادت ۽ سوشل ميڊيا تي ان جي ڪارڪنن پاران قومي سلامتيءَ جي اداري جي خلاف نفرت تي ٻڌل مهم هلائڻ جا الزام مڙهيندي رهي آهي. پر پي ٽي آءِ انهن الزامن جي ترديد ڪري ٿي ۽ مسلم ليگ ن جي اڳواڻيءَ ۾ اتحادي حڪومت تي ملڪي ادارن جي وچ ۾ محاذ آرائيءَ کي هوا ڏيڻ جو الزام لڳائيندي آهي.
سياسي صورت حال متعلق اعلان واضح ناهي
مبصرن کي اميد هئي ته عدليه ۽ حڪومت جي وچ ۾ پيدا ٿيل ڊيڊلائين جي صورت حال اجلاس ۾ بحث هيٺ ايندي. ليڪن اجلاس جي اعلان ۾ موجوده سياسي صورت حال تي ڪا براه راست ڳالهه سامهون نه آئي آهي.
عمران خان به پنهنجي تائيد ۾ بيان نه ڏياري سگهيو
قومي سلامتي ڪاميٽيءَ سيڪيورٽي معاملن تي فيصله سازي ڪرڻ واري بنيادي اداري جي حيثيت ۾ ڪم ڪندي آهي.
اڳوڻي سيڪريٽري دفاع رهڻ واري نعيم خالد لوڌيءَ چيو آهي ته ملڪ جي معاملن متعلق ڪو به وڏو فيصلو يا صورت حال چاهي اها پرڏيهي پاليسي جي متعلق هجي، معيشت يا گهرو يا پرڏيهي سلامتي جو معاملو هجي هن ڪاميٽيءَ آڏو بحث هيٺ ايندا آهن.
سياسي ۽ فوجي قيادت تي مشتمل ان ڪاميٽيءَ جو اجلاس گزريل سال ان وقت به منعقد ڪيو ويو هو جڏهن اڳوڻي وزير اعظم عمران خان ’سائيفر’ جي بنياد تي دعوا ڪئي هئي ته سندس حڪومت کي ٻاهرين سازش جي ذريعي ختم ڪيو پيو وڃي.
