قومی اسمبلی کا اجلاس بدھ کی صبح 10 بجے تک ملتوی کردیا گیا ہے۔ بدھ کو اجلاس میں اسمبلی کے نئے اسپیکر کا انتخاب ہوگا جو اپنے عہدے کا حلف اٹھانے کے بعد ڈپٹی اسپیکر کا انتخاب کرائیں گے۔
عمران خان کو دستخط کے لیے بلائے جانے پر نعرے بازی
قومی اسمبلی کے افتتاحی اجلاس میں نومنتخب ارکان کی حلف برداری کے بعد جب تحریکِ انصاف کے سربراہ عمران خان کا نام ارکان کے رجسٹر پر دستخط کے لیے پکارا گیا تو ایوان میں پی ٹی آئی کے ارکان نے "وزیرِ اعظم، عمران خان" اور "آئی آئی، پی ٹی آئی" کے نعرے لگائے اور ڈیسک بجا کر ان کا خیر مقدم کیا۔
بلوچستان اسمبلی کے ارکان کی حلف برداری
بلوچستان کی نئی اسمبلی کے نومنتخب ارکان نے بھی حلف اٹھالیا ہے۔
اسمبلی کا افتتاحی اجلاس پیر کو کوئٹہ میں ہوا جس کی صدارت سابق اسمبلی کی اسپیکر راحیلہ درانی نے کی۔
اجلاس میں 65 رکنی بلوچستان اسمبلی کے 61 نو منتخب ارکان نے حلف اٹھایا۔
بلوچستان اسمبلی کے ارکان کی حلف برداری کے بعد 25 جولائی کے انتخابات کے نتیجے میں وجود میں آنے والی پاکستان کی قومی اسمبلی اور تین صوبائی اسمبلیوں - سندھ، خیبر پختونخوا اور بلوچستان - کے ارکان کی حلف برداری کا عمل مکمل ہوگیا ہے جس کے بعد اب یہ اسمبلیاں اسپیکر اور ڈپٹی اسپیکر کا انتخاب کریں گی۔
پنجاب اسمبلی کا افتتاحی اجلاس بدھ، 15 اگست کو طلب کیا گیا ہے۔
