اسٹینڈ بائی معاہدے کا دوسرا جائزہ؛ آئی ایم ایف اور پاکستان کے درمیان مذاکرات کا آغاز

پاکستان کے ایوانِ بالا (سینیٹ) کے مختلف اراکین کے رکنِ قومی اسمبلی یا رکنِ صوبائی اسمبلی منتخب ہونے کے بعد خالی ہونے والی چھ نشستوں پر آج انتخاب ہو رہا ہے۔

اسلام آباد سے ایک، سندھ سے دو اور بلوچستان سے تین خالی نشستوں پر ضمنی انتخاب کے لیے متعلقہ اسمبلیوں میں پولنگ کا عمل صبح نو بجے سے شام چار بجے تک جاری رہے گا۔

پاکستان پیپلز پارٹی کے سینیٹر یوسف رضا گیلانی کے رکنِ قومی اسمبلی منتخب ہونے کے بعد سینیٹ کی خالی ہونے والی نشست پر آج قومی اسمبلی میں پولنگ ہو گی۔ اس وقت تک قومی اسمبلی کے 311 اراکین بطور رکن حلف لے چکے ہیں جو ووٹ کا حق استعمال کر پائیں گے۔

اسلام آباد سے سینیٹ کی نشست کے لیے حکومتی اتحاد کے امیدوار یوسف رضا گیلانی اور سنی اتحاد کونسل کے امیدوار الیاس مہربان کے درمیان مقابلہ ہے۔

مزید پڑھیے

حکومتِ سندھ نے وزیر اعظم شہباز شریف سے انڈس ریور سسٹم اتھارٹی (ارسا) کے چیئرمین کی تعیناتی کا نوٹی فکیشن واپس لینے کا مطالبہ کیا ہے۔

صوبائی حکومت کے مطابق ارسا چیئرمین کی تعیناتی واٹر اکارڈ اور ارسا ایکٹ کی خلاف ورزی ہے۔ وزیرِ آبپاشی سندھ کا کہنا ہے کہ ارسا کا چیئرمین صوبوں کا ممبر یا وفاق کا نمائندہ ہوتا ہے، کوئی باہر کا شخص چیئرمین نہیں بن سکتا۔

واضح رہے کہ وفاقی حکومت نے گریڈ 22 کے ریٹائرڈ افسر ظفر محمود کو 12 مارچ کو ارسا کا نیا چئیرمین تعینات کیا تھا۔

الیکشن کمیشن نے سینیٹ کے ریٹائر ہونے والے 48 اراکین کی نشستوں پر انتخابات کا باضابطہ طور شیڈول جاری کردیا ہے۔

شیڈول کے مطابق سینیٹ کی خالی ہونے والی نشستوں کے لیے 15 سے 16 مارچ تک نامزدگی فارم جمع کرائے جا سکیں گے جب کہ 19 مارچ تک نامزدگی فارمز کی اسکروٹنی کی جائے گی۔

الیکشن کمیشن کے مطابق نامزدگی فارم منظور یا مسترد ہونے کے خلاف اپیلیں 21 مارچ تک داخل کی جا سکیں گی اور ٹربیونلز اپیلوں پر 25 مارچ تک فیصلے سنائیں گے۔

واضح رہے کہ سینیٹ کی 48 نشستوں پر دو اپریل کو پولنگ ہو گی۔ ان نشستوں میں اسلام آباد کی دو نشستیں شامل ہیں جس کے لیے قومی اسمبلی کے اراکین ووٹ ڈالیں گے۔

صوبہ بلوچستان اور خیبر پختونخوا میں 11، 11 نشستوں پر متعلقہ اسمبلیوں میں پولنگ ہوگی جب کہ صوبہ پنجاب اور سندھ میں 12،12 نشستوں پر انتخابات ہوں گے۔

صدرِ پاکستان آصف علی زرداری نے چین کے ہم منصب شی جن پنگ کو خط لکھا ہے جس میں بیجنگ کے ساتھ شراکت داری مضبوط بنانے کے عزم کا اظہار کیا ہے۔

ایوانِ صدر سے جاری ایک بیان کے مطابق صدر زرداری کا کہنا ہے کہ پاکستان اور چین محض پڑوسی نہیں بلکہ آہنی بھائی ہیں اور دونوں ممالک کی مضبوط دوستی علاقائی امن، استحکام اور ترقی کے لیے کلید کی حیثیت رکھتی ہے۔

صدر زرداری نے اپنے خط میں کہا ہے کہ پاکستان اور چین نے سی پیک سمیت دوطرفہ تعاون کے مختلف شعبوں میں نمایاں پیش رفت کی اور صدر شی جن پنگ کی غیر متزلزل حمایت سی پیک کی ترقی کے لیے ناگزیر رہے گی۔

ان کے بقول تاریخ نے پاکستان اور چین کو ایک منفرد رشتے میں جوڑا ہے۔ تمام عالمی مسائل پر باہمی احترام، افہام و تفہیم اور مشترکہ خیالات سے پاکستان اور چین تعلقات مزید مستحکم ہوئے ہیں۔