سندھ اسمبلی کے نومنتخب اراکین نے حلف اُٹھا لیا
سندھ اسمبلی کے نومنتخب اراکین نے رُکنیت کا حلف اُٹھا لیا۔ اسپیکر سندھ اسمبلی آغا سراج دُرانی نے اراکین سے حلف لیا۔ 168 میں سے 148 اراکین نے حلف اُٹھایا۔
اسپیکر سندھ اسمبلی آغا سراج درانی نے اراکین سے سندھی، اردو اور انگریزی میں حلف لیا۔
جماعت اسلامی، گرینڈ ڈیموکریٹک الائنس اور تحریک انصاف کے کامیاب امیدواروں میں سے کسی نے حلف برداری میں شرکت نہیں کی۔
انتخابات میں مبینہ دھاندلی کے خلاف جی ڈے اے اور جے یو آئی کا احتجاج
سندھ اسمبلی کے افتتاحی اجلاس کے موقع پر مبینہ انتخابی دھاندلیوں کے خلاف احتجاج کی کال پر سخت حفاظتی اقدامات، مختلف سڑکوں پر پولیس نے رکاوٹیں کھڑی کردیں۔
احتجاج کی کال جی ڈی اے اور اتحادی جماعتوں کی جانب سے دی گئی ہے۔ پولیس نے احتجاج کرنے والے متعدد کارکنوں کو حراست میں لے لیا۔
انتخابات میں مبینہ دھاندلی کے خلاف جمعیت علمائے اسلام (ف) نے بھی سندھ اسمبلی کے باہر دھرنے کا اعلان کر رکھا ہے۔
سندھ کے مختلف شہروں سے جے یو آئی کے قافلے کراچی پہنچ رہے تھے، تاہم شاہراہ فیصل سمیت سندھ اسمبلی کے اطراف ریڈ زون میں کنٹینر کھڑے کر کے راستے بند کر دیے گئے ہیں۔ سندھ حکومت نے ریڈ زون میں دفعہ 144 بھی نافذ کر دی ہے۔
صحافی عمران ریاض نے ضمانت کے لیے درخواست دائر کر دی
بدعنوانی کے الزام میں گرفتار ہونے والے صحافی اور یوٹیوبر عمران ریاض نے ضمانت کے لیے درخواست دائر کر دی۔
درخواست میاں علی اشفاق ایڈووکیٹ, اظہر صدیق اور رانا معروف کی وساطت سے دائر کی گئی ہے۔
درخواست میں مؤقف اختیار کیا گیا ہے کہ عمران ریاض کے خلاف جھوٹا اور بے بنیاد مقدمہ درج کیا گیا اور اُنہیں سیاسی انتقام کا نشانہ بنایا جا رہا ہے۔