براہِ راست علی امین گنڈا پور کی قیادت میں پی ٹی آئی کا قافلہ اسلام آباد کے قریب پہنچ گیا

حکام کا کہنا ہے کہ اٹک میں پی ٹی آئی کے مظاہرین کے ساتھ جھڑپوں میں پنجاب پولیس کا ایک اہلکار ہلاک ہوگیا ہے۔

وفاقی وزیرِ داخلہ محسن نقوی نے اپنے بیان میں کہا ہے کہ کانسٹیبل مبشر پر تشدد کرنے والے مظاہرین کو قانون کی گرفت میں لایا جائے گا۔

پی ٹی آئی کا کہنا ہے کہ اس کے حامی پولیس پر تشدد میں ملوث نہیں ہیں۔

وزیرِ اعلیٰ خیبرپختونخوا علی امین گنڈا پور کی قیادت میں احتجاج کے لیے آنے والا قافلہ اسلام آباد کے قریب پہنچ گیا ہے۔

حسن ابدال کے نزدیک پی ٹی آئی کے قافلے میں شامل مظاہرین اور پولیس آمنے سامنے آگئے اور پولیس نے مظاہرین پر شیلنگ بھی کی ہے۔

اطلاعات کے مطابق ہکلہ انٹر چینج پر بھی پی ٹی آئی کے کارکن موجود ہیں۔

وزیرِ اطلاعات پنجاب کی پریس کانفرنس پر اپنے ردِ عمل میں ترجمان پی ٹی آئی نے کہا ہے کہ ہمارے کارکنوں نے خود پر ظلم کرنے والے پولیس اہل کاروں کو ہاتھ لگنے کے باوجود نہ صرف یہ کہ نقصان نہیں پہنچایا بلکہ انہیں آزاد کیا۔

پی ٹی آئی کے ترجمان نے اپنے بیان میں کہا ہے کہ من گھڑت شواہد کا جمعہ بازار لگانے والے آج تک نو مئی سے متعلق عدالت میں ایک بھی قابلِ بھروسہ ثبوت پیش نہیں کرسکے۔

ترجمان نے کہا کہ عوام اور پولیس کے مابین تصادم کی آڑ میں اپنی ناجائز سرکار کا دوام چاہتی ہے۔

انہوں نے کہا کہ پرامن احتجاج کے لیے نکلنے والے ہزاروں افراد پر مشتمل احتجاجی قافلہ مکمل طور پر پرامن اور مثالی نظم و ضبط سے ڈی چوک کی جانب بڑھ رہا ہے۔

پنجاب کی وزیرِ اطلاعات عظمی بخاری نے کہا ہے کہ پی ٹی آئی کے مظاہرین پولیس اہل کاروں پر حملے کر رہے ہیں۔

لاہور میں پریس کانفرنس میں انہوں نے کہا کہ پانچ زخمی اہلکاروں کی حالت تشویش ناک ہے۔ پولیس کو جس طرح نشانہ بنایا جارہا ہے یہ سیاسی ورکرز کا کام نہیں۔

عظمیٰ بخاری نے کہا کہ پی ٹی آئی ایک اور نو مئی کی منصوبہ بندی کر رہی ہے۔ ایک جانب ریاست سے مذاکرات کی بات کی جاتی ہے اور دوسری جانب اس پر حملے کیے جاتے ہیں۔

انہوں نے کہا کہ پنجاب، سندھ اور بلوچستان نے پی ٹی آئی کی سیاست کو مسترد کردیا ہے۔