حکومت کی پی ٹی آئی کو سنگجانی میں ریلی کرنے کی اجازت کی پیش کش

وفاقی دارالحکومت میں نجی اسکولوں کی ایسوسی ایشن نے منگل کو اسکول بند رکھنے کا اعلان کیا ہے۔

اسلام آباد میں پی ٹی آئی کے احتجاج کے پیشِ نظر پیر کو بھی تعلیمی ادارے بند تھے۔

احتجاج کو روکنے کے لیے حکومت کی جانب سے اسلام آباد میں کئی مرکزی راستے بند ہیں جب کہ موبائل اور انٹرنیٹ سروسز بھی معطل ہیں۔

بیلاروس کے صدر الیگزینڈر لوکا شینکو تین روزہ سرکاری دورے پر پاکستان پہنچ گئے ہیں۔ نور خان ایئر بیس پر وزیرِ اعظم شہباز شریف سمیت دیگر اعلٰی حکام نے بیلاروسی صدر کا استقبال کیا۔

حکام کے مطابق دورے میں صدر لوکا شینکو وزیرِ اعظم اور صدرِ پاکستان سے ملاقاتوں کے علاوہ باہمی تجارت سمیت دیگر شعبوں میں تعاون پر بھی تبادلۂ خیال کریں گے۔

پاکستان اور بیلاروس کے درمیان تجارت، زراعت اور صنعت سمیت دیگر شعبوں میں معاہدوں پر دستخط ہوں گے۔

اس سے قبل بیلاروس کا ایک 68 رُکن اعلٰی سطح کا وفد اتوار کو پاکستان پہنچا تھا۔

حکام کا کہنا ہے کہ اٹک میں پی ٹی آئی کے مظاہرین کے ساتھ جھڑپوں میں پنجاب پولیس کا ایک اہلکار ہلاک ہوگیا ہے۔

وفاقی وزیرِ داخلہ محسن نقوی نے اپنے بیان میں کہا ہے کہ کانسٹیبل مبشر پر تشدد کرنے والے مظاہرین کو قانون کی گرفت میں لایا جائے گا۔

پی ٹی آئی کا کہنا ہے کہ اس کے حامی پولیس پر تشدد میں ملوث نہیں ہیں۔

وزیرِ اعلیٰ خیبرپختونخوا علی امین گنڈا پور کی قیادت میں احتجاج کے لیے آنے والا قافلہ اسلام آباد کے قریب پہنچ گیا ہے۔

حسن ابدال کے نزدیک پی ٹی آئی کے قافلے میں شامل مظاہرین اور پولیس آمنے سامنے آگئے اور پولیس نے مظاہرین پر شیلنگ بھی کی ہے۔

اطلاعات کے مطابق ہکلہ انٹر چینج پر بھی پی ٹی آئی کے کارکن موجود ہیں۔