'ہمارے نمبر پورے نہیں ہوتے تو اتحاد کے بجائے اپوزیشن میں بیٹھیں گے'

صدرِ پاکستان ڈاکٹر عارف علوی نے کہا ہے کہ شہریوں کے مینڈیٹ کا احترام ہونا چاہیئے اور اسے کھل کر تسلیم کرنا چاہیے۔

انتخابات کے انعقاد پر جاری کیے گئے اپنے پیغام میں صدر نے کہا کہ سیاست دانوں، ان کی جماعتوں اور ہمارے اداروں کو اس موقعے کا فائدہ اٹھانا چاہیے۔

انہوں نے کہا کہ پاکستان کے عوام خاص طور پر خواتین کو شدید مشکلات کے باوجود بڑی تعداد میں باہر نکلنےاور جمہوریت کی مضبوطی کے لیے ووٹ دینے پر مبارک باد پیش کرتا ہوں۔

عارف علوی نے کہا کہ نوجوان بھی باالخصوص داد کے مستحق ہیں کہ انہوں نے ووٹنگ کے عمل میں پرامن طریقے سے حصہ لے کر ملک کی باگ ڈور سنبھالنے کا فیصلہ کیا ہے۔

پاکستان پیپلز پارٹی کے مرکزی سیکریٹری جنرل فیصل کریم کنڈی نے کہا کہ اگر بلاول بھٹو زرداری مستحکم اتحاد کے ساتھ وزیرِ اعظم نہیں بنتے تو ہمیں حزبِ اختلاف میں بیٹھنا چاہیے۔

سوشل میڈیا پلیٹ فارم 'ایکس' پر اپنی پوسٹ میں ان کا کہنا تھا کہ میری تجویز ہے کہ اگر بلاول بھٹو زرداری وزیرِ اعظم نہیں بنتے تو اپوزیشن میں بیٹھ کر اپنی پارٹی کو ترجیح دیتے ہوئے اپنے لوگوں کی خدمت کریں۔

عوامی نیشنل پارٹی کے صوبائی صدر ایمل ولی خان نے کہا ہے کہ یہ پہلا موقع نہیں کہ ہم پر پارلیمان کا راستہ روکا گیا ہو۔

وائس آف امریکہ کےنمائندے شمیم شاہد کے مطابق چارسدہ میں پریس کانفرنس کرتے ہوئے ان کا کہنا تھا کہ عوام کی خدمت کے لیے انہیں پارلیمان کی ضرورت نہیں ہے۔ ان کے بقول آٹھ فروری کو جو ہوا اس سے ہماری سیاست مزید کھل گئی ہے۔ سیاست کے لیے پارلیمان اور حکومت کی ضرورت نہیں۔

ان کا کہنا تھا کہ آٹھ فروری کو عمران خان کے نام پر ووٹ لیا گیا یا ڈالا گیا۔ ووٹ اور نام استعمال ہوا۔ اب یہی ووٹ کسی اور جھولی میں گرنے والا ہے۔ ایمل ولی کے بقول بدقسمتی سے نقصان خیبرپختونخوا کا ہوا ہے۔

عوامی نیشنل پارٹی کے صوبائی صدر نے کہا کہ ان کی جماعت نے 2024 تک پختونخوا میں قیام امن کے لیے دہشت گردی کے خلاف اسٹیبلشمنٹ کے ساتھ کھڑے ہوئی۔ان کے بقول "ہم نے اسٹیبلشمنٹ اور وطن کے لیے گولیاں کھائیں۔ یہ ہماری غلطی اور غلط فہمی ہے کہ اسٹیبلشمنٹ پختونوں کے لیے کوئی اچھی سوچ رکھے گی۔‘‘

ایمل ولی خان نے کہا کہ صرف عوامی نیشنل پارٹی نہیں بلکہ پی ٹی آئی کے امیدواروں کو بھی ہرایا گیا تاکہ خیبرپختونخوا میں بھی بلوچستان جیسی کٹھ پتلی حکومت قائم ہو۔ انہوں نے الزام عائد کیا کہ پی ٹی آئی کے ان اہم رہنماؤں کو بھی ہروایا گیا جو وزیراعلی کے امیدوار سمجھے جاتے تھے۔

لاہور کے حلقہ این اے 121 سے کامیاب ہونے والے پی ٹی آئی کے حمایت یافتہ آزاد امیدوار وسیم قادر نے مسلم لیگ (ن) میں شمولیت کا اعلان کیا ہے۔

مسلم لیگ (ن) کی جانب سے سوشل میڈیا پلیٹ فارم 'ایکس' پر پوسٹ کی گئی ایک ویڈیو میں وسیم قادر مسلم لیگ (ن) کی چیف آرگنائزر مریم نواز اور دیگر افراد کے ساتھ موجود ہیں۔

اس ویڈیو میں وسیم قادر کا کہنا تھا کہ وہ پی ٹی آئی لاہور کے جنرل سیکریٹری تھے۔ وہ اپنے گھر واپس آگئے ہیں اور وہ اپنے علاقے اور لوگوں کی ترقی کے لیے مسلم لیگ (ن) میں شامل ہو رہے ہیں۔

واضح رہے کہ الیکشن کمیشن کے غیر حتمی نتائج کے مطابق این اے 121 سے وسیم قادر آزاد امیدوار کی حیثیت سے کامیاب ہوئے تھے جب کہ مسلم لیگ (ن) کے روحیل اصغر دوسرے نمبر پر آئے تھے۔