عمران خان سے ملاقات پر پابندی قابلِ مذمت ہے، ان کی جان کو خطرہ ہے: تحریکِ انصاف
پاکستان تحریکِ انصاف کے چیئرمین بیرسٹر گوہر علی خان نے کہا ہے کہ عمران خان سے ملاقات پر پابندی قابلِ مذمت ہے۔ پابندی سے قبل ان کے اہلِ خانہ اور وکلا کو آگاہ کرنا ضروری تھا۔
اسلام آباد میں پریس کانفرنس کرتے ہوئے بیرسٹر گوہر علی خان کا کہنا تھا کہ عمران خان کی زندگی کو خطرہ ہے۔ ان کو خطرہ ان سے ہے جن کی وہ تحویل میں ہیں۔ عمران خان عام قیدی نہیں ہیں۔
انہوں نے مطالبہ کیا کہ عمران خان سے بدھ کو ملاقات کی اجازت دی جائے۔ اس ملاقات کے بعد تحریکِ انصاف مستقبل کے لائحہ عمل کا اعلان کرے گی۔
پی ٹی آئی رہنما عمر ایوب کا کہنا تھا کہ وزیرِ اعلیٰ پنجاب مریم نواز اور دیگر اعلیٰ حکام اس پابندی کے ذمہ دار ہیں۔
انہوں نے کہا کہ وہ وکلا کے ساتھ عمران خان سے ملاقات کے لیے جیل پہنچے تھے لیکن ان کو ملاقات کی اجازت نہیں دی گئی۔
قرض کی نئی قسط کا اجرا، آئی ایم ایف وفد کی پاکستان آمد
بین الاقوامی مالیاتی فنڈ (آئی ایم ایف) سے پاکستان کے اسٹینڈ بائی پروگرام کے تحت اگلی قسط کے اجرا پر مذاکرات کے حوالے سے آئی ایم ایف وفد پاکستان پہنچ رہا ہے۔
مقامی میڈیا کے مطابق آئی ایم ایف کا وفد منگل کو پاکستان آئے گا جس سے پاکستانی حکام کے 14 سے 18 مارچ کے درمیان مذاکرات ہوں گے۔
پاکستان کے آئی ایم ایف سے مذاکرات کامیاب ہونے کی صورت میں ایک ارب 10 کروڑ ڈالر کی اگلی قسط جاری ہو سکتی ہے۔
پاکستان کے نئے وزیرِ خزانہ محمد اورنگزیب بھی پاکستان کی معیشت کے لیے آئی ایم ایف کے پروگرام کو ناگزیر قرار دے چکے ہیں۔
مبینہ دھاندلی کے خلاف احتجاج، پی ٹی آئی رہنماؤں کی درخواستِ ضمانت منظور
اسلام آباد کی مقامی عدالت نے گلگت بلتستان کے سابق وزیرِ اعلیٰ خالد خورشید کی مبینہ دھاندلی کے خلاف احتجاج پر مقدمے میں ضمانت منظور کر لی ہے۔
مبینہ دھاندلی کے خلاف احتجاج پر گلگت بلتستان کے سابق وزیرِ اعلیٰ خالد خورشید نے ضمانت قبل از گرفتاری کے لیے اسلام آباد کے ایڈیشنل ڈسٹرکٹ اینڈ سیشن جج کی عدالت سے رجوع کیا ۔
ایڈیشنل ڈسٹرکٹ اینڈ سیشن جج طاہر عباس سپرا نے ان کی درخواستِ ضمانت پر سماعت کی۔ عدالت نے پانچ ہزار روپے کے مچلکوں کے عوض خالد خورشید کی درخواستِ ضمانت منظور کر لی۔
عدالت نے فریقین کو نوٹس جاری کرتے ہوئے کیس کی سماعت 19 مارچ تک ملتوی کر دی۔
علاوہ ازیں پی ٹی آئی رہنما سیمابیہ طاہر، محمد عظیم اور تیمور مسعود کی ضمانت قبل از گرفتاری کی درخواستیں بھی منظور کر لی گئی ہیں۔
جج طاہر عباس سپرا نے ان کی درخواستیں منظور کرتے ہوئے پانچ پانچ ہزار روپے کے مچلکے جمع کرانے کا حکم دیا۔
اڈیالہ جیل: عمران خان سمیت تمام قیدیوں سے ملاقات پر دو ہفتے کی پابندی عائد