آئینی ترامیم: قومی اسمبلی کا سات گھنٹے تاخیر سے شروع ہونے والا اجلاس چند منٹ میں ملتوی

حکومت کی اتحادی جماعت متحدہ قومی موومنٹ(ایم کیو ایم) کے رہنما فاروق ستار نے کہا ہے آئینی ترمیم سے متعلق حتمی فیصلہ نہیں کیا ہے۔

انہوں ںے کہا کہ ایسے ماحول میں کی جانے والی ترامیم پسندیدہ نہیں ہوتیں۔ لیکن معاملات کو آگے بڑھانے کے لیے آئینی ترمیم کی حمایت کی جاسکتی ہے۔

ایم کیو ایم کے رہنما کا کہنا تھا کہ آئینی ترمیم پر مولانا فضل الرحمان کے اختلافات ثانوی نوعیت کے ہیں۔

تحریکِ انصاف کےچیئرمین بیرسٹر گوہر نے کہا ہے کہ مولانا فضل الرحمٰن رات تک ہمارے ساتھ تھے امید ہے آج بھی ساتھ رہیں گے۔

انہوں نے کہا کہ رات کی تاریکی میں بننے والی یہ حکومت رات کی تاریکی میں متحرک ہوتی ہے۔

بیرسٹر گوہر نے کہا کہ حکومت جو بل لا رہی ہے وہ آئینی ترمیم نہیں غیر آئینی ترمیم ہے۔

آج پارلیمنٹ میں ممکنہ طور پر پیش ہونے والے آئینی پیکج کی منظوری کے لیے ہونے والے کابینہ کے خصوصی اجلاس میں تاخیر ہوگئی ہے۔

مقامی میڈیا کے مطابق کابینہ کے اجلاس میں تاخیر کے باعث قومی اسمبلی اور سینیٹ کی اجلاس بھی مزید مؤخر ہو سکتے ہیں کیوں کہ مسودے کا کابینہ میں پیش ہونا ضروری ہے۔

قومی اسمبلی اور سینٹ کے آج ہونے والے اجلاس کا وقت پہلے ہی دو بار تبدیل کیا جاچکا ہے۔

وفاقی وزیرِ اطلاعات عطا اللہ تارڑ نے کہا ہے کہ انفرادی طور پر کوئی قانون سازی نہیں ہو گی۔

ان کا کہنا تھا کہ مولانا فضل الرحمٰن پرانے اتحادی ہیں۔ ان کا دعویٰ تھا کہ ان کے حوالے سے مثبت خبر آئے گی۔

وزیرِ اطلاعات کا یہ بھی دعویٰ تھا کہ آئینی ترمیم کے لیے نمبر گیم میں مسئلہ نہیں ہوگا۔